विशेष सघन मतदार यादी पुनरिक्षण (SIR) मोहिमेदरम्यान बूथ लेव्हल ऑफिसर (BLO) आणि बूथ लेव्हल एजंट (BLA) यांना येणाऱ्या अडचणींबाबत भारतीय जनता पक्षाचे नेते किरण जाधव यांनी लोकसभा खासदार जगदीश शेट्टर यांची भेट घेऊन सविस्तर चर्चा केली.
या भेटीत प्रत्यक्ष सर्वेक्षणाच्या कामकाजात येणाऱ्या अडथळ्यांवर, नागरिकांशी समन्वय साधताना उद्भवणाऱ्या अडचणींवर तसेच सर्वेक्षण अधिक प्रभावी आणि वेळेत पूर्ण होण्यासाठी आवश्यक उपाययोजनांवर चर्चा झाली. संबंधित प्रशासकीय यंत्रणेशी समन्वय साधून या समस्यांचे तातडीने निराकरण व्हावे, अशी मागणी किरण जाधव यांनी खासदार शेट्टर यांच्याकडे केली.
यावेळी खासदार जगदीश शेट्टर यांनी मांडण्यात आलेल्या सर्व मुद्द्यांची गांभीर्याने दखल घेत संबंधित विभाग आणि शासन स्तरावर पाठपुरावा करण्याचे आश्वासन दिले. तसेच, मतदार यादी पुनरिक्षणाच्या महत्त्वपूर्ण प्रक्रियेत योगदान देणाऱ्या BLO आणि BLA यांच्या कार्याचे त्यांनी कौतुक करत त्यांना आवश्यक सहकार्य मिळावे, यासाठी प्रयत्न करण्यात येतील, असे स्पष्ट केले.
या बैठकीला हनमंत कागलकर, राजन जाधव, गणेश देढे, पार्थ भोसले आणि विनायक शिनगावकर उपस्थित होते. या चर्चेमुळे SIR सर्वेक्षणाशी संबंधित अनेक प्रलंबित प्रश्नांना लवकरच मार्ग मिळेल, असा विश्वास उपस्थितांनी व्यक्त केला.
