कर्नाटकातील नव्या मंत्रिमंडळाच्या खातेवाटपाची अधिकृत घोषणा करण्यात आली असून मुख्यमंत्री डी. के. शिवकुमार यांच्या नेतृत्वाखालील सरकारने प्रशासनातील सातत्याला प्राधान्य दिल्याचे स्पष्ट झाले आहे. अनेक मंत्र्यांकडे पूर्वीचीच खाती कायम ठेवण्यात आली आहेत.
बेळगाव जिल्ह्याचे ज्येष्ठ काँग्रेस नेते आणि राज्य मंत्रिमंडळातील महत्त्वाचे सदस्य सतीश जारकीहोळी यांच्याकडे पुन्हा एकदा सार्वजनिक बांधकाम (PWD) खात्याची जबाबदारी सोपविण्यात आली आहे. यापूर्वीच्या कार्यकाळातही त्यांनी हे खाते सांभाळले होते. त्यामुळे राज्यातील रस्ते, पूल आणि विविध पायाभूत सुविधा प्रकल्पांच्या कामांना अधिक वेग मिळण्याची अपेक्षा व्यक्त केली जात आहे.
मुख्यमंत्री डी. के. शिवकुमार यांनी वित्त, मंत्रिमंडळ व्यवहार, कार्मिक व प्रशासकीय सुधारणा, गुप्तचर विभाग तसेच इतर वाटप न झालेली खाती स्वतःकडे ठेवली आहेत. उपमुख्यमंत्री डॉ. जी. परमेश्वर यांच्याकडे महसूल आणि क्रीडा खात्याची जबाबदारी सोपविण्यात आली आहे.
मंत्रिमंडळातील काही विभागांमध्ये मर्यादित स्वरूपाचे बदल करण्यात आले आहेत. नगर विकास खात्याची धुरा डॉ. यतींद्र सिद्धरामय्या यांच्याकडे देण्यात आली असून या बदलाकडे राजकीय वर्तुळाचे लक्ष लागले आहे.
प्रमुख मंत्र्यांमध्ये के. एच. मुनियप्पा यांच्याकडे अन्न व नागरी पुरवठा, के. जे. जॉर्ज यांच्याकडे ऊर्जा व पर्यटन, एम. बी. पाटील यांच्याकडे मोठे व मध्यम उद्योग तसेच पायाभूत सुविधा विकास, तर रामलिंगा रेड्डी यांच्याकडे प्रमुख व मध्यम सिंचन विभागाची जबाबदारी देण्यात आली आहे.
राज्यातील विकासकामांना गती देण्याच्या दृष्टीने अनुभवी मंत्र्यांकडे महत्त्वाची खाती कायम ठेवण्याचा सरकारचा प्रयत्न असल्याचे राजकीय विश्लेषकांचे मत आहे.
