बेळगाव | प्रतिनिधी
दक्षिण महाराष्ट्र शिक्षण मंडळ संचलित ज्योती सेंट्रल स्कूलने पुन्हा एकदा राष्ट्रीय पातळीवर आपला ठसा उमटवला आहे. शाळेतील इयत्ता नववीत शिक्षण घेत असलेली कु. शिफाली संतोष कांबळे हिने राष्ट्रीय स्तरावरील वैयक्तिक नृत्य स्पर्धेत उल्लेखनीय यश संपादन करत द्वितीय क्रमांक पटकावला आहे.
बीदर येथे नुकत्याच पार पडलेल्या ‘नॅशनल लेव्हल डान्स कॉम्पिटिशन (KWC Dance Competition)’ मध्ये देशभरातून सहभागी झालेल्या स्पर्धकांमध्ये शिफालीने आपल्या बहारदार सादरीकरणाने परीक्षकांची विशेष दखल घेतली. तिच्या सशक्त भावअभिनय, तालबद्ध हालचाली आणि आत्मविश्वासपूर्ण सादरीकरणाला परीक्षकांकडून मोठी दाद मिळाली.
या यशाबद्दल शिफालीला मान्यवरांच्या हस्ते चषक, प्रमाणपत्र तसेच ७ हजार रुपये रोख पारितोषिक देऊन सन्मानित करण्यात आले. या स्पर्धेचे परीक्षण प्रसिद्ध कोरिओग्राफर कार्तिक प्रियदर्शन यांनी केले.
शिफालीच्या या उज्ज्वल यशाबद्दल शाळेचे एस.एम.सी. चेअरमन प्रा. आर. के. पाटील, व्हाईस चेअरमन प्रो. आर. एस. पाटील, सेक्रेटरी प्रो. नितीन घोरपडे, मुख्याध्यापिका श्रीमती सोनाली कंग्राळकर, शिक्षकवृंद तसेच पालकांनी तिचे मनःपूर्वक अभिनंदन केले आहे. शिफालीच्या या यशामुळे शाळेच्या नावलौकिकात भर पडली असून सर्व स्तरांतून तिच्यावर कौतुकाचा वर्षाव होत आहे.
