बेळगाव : "सेवा सर्वोपरी" या ब्रीदवाक्याला अनुसरून रोटरी क्लब ऑफ बेळगाव नॉर्थ यांच्या वतीने आगामी गणेशोत्सव पर्यावरणपूरक पद्धतीने साजरा करण्यासाठी विशेष जनजागृती मोहीम सुरू करण्यात आली आहे. या मोहिमेअंतर्गत जिल्हाधिकारी मोहम्मद रोशन यांना निवेदन सादर करण्यात आले. यावेळी जिल्हाधिकाऱ्यांनीही या उपक्रमाला पाठिंबा दर्शवत नागरिकांनी पर्यावरणपूरक गणेशोत्सव साजरा करण्याचे आवाहन केले.
रोटरी क्लबने नागरिकांसाठी दहा महत्त्वाच्या सूचना जारी केल्या आहेत. त्यामध्ये फक्त मातीच्या गणेशमूर्तींचा वापर करणे, पीओपी (Plaster of Paris) मूर्ती टाळणे, नैसर्गिक रंगांचा वापर, कृत्रिम विसर्जन तलावातच विसर्जन करणे, प्लास्टिक व थर्माकोल सजावट टाळणे, एलईडी दिव्यांचा वापर, रात्री १० नंतर ध्वनिक्षेपक न वापरणे, बाप्पासोबत एक झाड लावणे, निर्माल्यापासून खत तयार करणे आणि गृहनिर्माण संस्था व मंडळांमध्ये जनजागृती करणे यांचा समावेश आहे.
याशिवाय, बेळगाव शहरातील दहा ठिकाणी मातीच्या गणेशमूर्ती उपलब्ध करून देण्यात आल्या असून नागरिकांनी पर्यावरणाच्या संरक्षणासाठी त्याच मूर्तींची निवड करावी, असे आवाहन करण्यात आले आहे.
या अभियानाचे अध्यक्ष रोटेरियन विकास गडवी, कार्यक्रम सचिव रोटेरियन मंगेश कांटक, अध्यक्ष (2026-27) रोटेरियन पी. डी. धोत्रे आणि सचिव (2026-27) डॉ. सुभाष पाटील यांनी उपक्रमात सहभाग घेतला.
