कंग्राळी बीकेमध्ये महालक्ष्मी यात्रेची धामधूम; माऊली सोसायटीकडून २५ हजारांची देणगी
बेळगाव तालुक्यातील कंग्राळी बीके गावात आगामी २८ एप्रिल २०२६ रोजी होणाऱ्या महालक्ष्मी यात्रेच्या पार्श्वभूमीवर गावात उत्साहाचे वातावरण निर्माण झाले आहे. यात्रेच्या निमित्ताने विविध विकासकामांना गती देण्यात आली असून बहुतेक कामे पूर्णत्वाच्या टप्प्यावर पोहोचली आहेत.
गावातील सर्व मंदिरांची रंगरंगोटी आणि परिसर सुशोभीकरणाचे काम अंतिम टप्प्यात आहे. यात्रेच्या यशस्वी आयोजनासाठी स्थानिक संस्था आणि नागरिकांचा उत्स्फूर्त सहभाग दिसून येत आहे.
याच अनुषंगाने माऊली को-ऑपरेटिव्ह सोसायटीच्या वतीने यात्रेसाठी २५ हजार रुपयांची देणगी देण्यात आली. सोसायटीचे अध्यक्ष, उपाध्यक्ष आणि सदस्यांच्या उपस्थितीत ही रक्कम महालक्ष्मी यात्रा उत्सव समितीच्या अध्यक्ष व सचिवांकडे सुपूर्द करण्यात आली.
या वेळी यात्रा समितीच्या वतीने सोसायटीच्या पदाधिकाऱ्यांचा भगवा शाल देऊन सन्मान करण्यात आला. सोसायटीचे चेअरमन प्रभाकर पाटील, व्हाईस चेअरमन मनोहर कडोलकर तसेच सदस्य सिद्राय चव्हाण, हनुमंत चव्हाण, अशोक पाटील, मनोहर पाटील आणि नारायण सी. पाटील यांचा यावेळी गौरव करण्यात आला.
याशिवाय मनोहर पाटील यांनी ₹५,००१ तर नारायण सी. पाटील यांनी ₹५,००० इतकी वैयक्तिक देणगी देत यात्रेस हातभार लावला.
गावातील नागरिकांच्या सहकार्यामुळे यंदाची महालक्ष्मी यात्रा अधिक भव्य आणि उत्साहपूर्ण होणार असल्याची भावना व्यक्त होत आहे.
