बेळगाव : उत्तर परिक्षेत्राच्या पोलीस महानिरीक्षकपदी (आयजीपी) नियुक्ती झाल्यानंतर वरिष्ठ पोलीस अधिकारी संदीप पाटील यांचा बेळगावातील ज्येष्ठ वकिलांनी सत्कार करून गौरव केला. या प्रसंगी उपस्थित मान्यवरांनी त्यांच्या प्रशासकीय कार्यशैलीचे आणि जनतेशी असलेल्या संवेदनशील दृष्टिकोनाचे कौतुक केले.
बेळगाव जिल्हा पोलीस प्रमुख म्हणून काम करताना संदीप पाटील यांनी कायदा व सुव्यवस्था राखणे, गुन्हेगारीवर नियंत्रण मिळवणे आणि नागरिकांमध्ये विश्वास निर्माण करणे यासाठी केलेल्या कार्याचा विशेष उल्लेख करण्यात आला. त्यांच्या नेतृत्वाखाली राबविण्यात आलेल्या विविध उपक्रमांमुळे पोलीस प्रशासनाची कार्यक्षमता वाढल्याचे मत उपस्थितांनी व्यक्त केले.
सत्काराला उत्तर देताना संदीप पाटील यांनी पोलीस यंत्रणा आणि न्यायव्यवस्था यांच्यातील परस्पर सहकार्य समाजातील शांतता आणि सुरक्षितता टिकवून ठेवण्यासाठी अत्यंत आवश्यक असल्याचे सांगितले. नागरिकांच्या हिताला प्राधान्य देत प्रभावी व पारदर्शक पोलीस प्रशासन देण्याची आपली बांधिलकी कायम राहील, असेही त्यांनी नमूद केले.
कार्यक्रमाला बेळगाव वकील संघाचे माजी उपाध्यक्ष अॅड. अण्णासाहेब घोरपडे, अॅड. आर. पी. पाटील, अॅड. एन. आर. लातूर, अॅड. मारुती कामाण्णाचे, अॅड. राजू हिरेमठ, अॅड. विनोद पाटील, अॅड. निंगाप्पा मस्ती, अॅड. मोहिते, अॅड. महेंद्र कांबळे, अॅड. विभूतीमठ, अॅड. राजेंद्र नलवडे, अॅड. एम. बी. बोंद्रे यांच्यासह अनेक विधिज्ञ उपस्थित होते. उपस्थितांनी संदीप पाटील यांना नव्या जबाबदारीसाठी शुभेच्छा देत त्यांच्या आगामी कार्यकाळासाठी यशाच्या शुभेच्छा दिल्या.
