बेळगाव शहरातील सीपीएड मैदानात उत्तर कर्नाटकातील सर्वात भव्य आणि प्रतिष्ठेचे मानले जाणारे रिअल इस्टेट प्रदर्शन ‘क्रेडाई बेलकॉन २०२६’ आज उत्साहपूर्ण वातावरणात सुरू झाले. या प्रदर्शनाचे उद्घाटन डीसीसी बँकेचे संचालक राहुल जारकीहोळी यांच्या हस्ते पार पडले. उद्घाटन सोहळ्याला सुप्रसिद्ध अभिनेत्री सोनाली कुलकर्णी हिने विशेष उपस्थिती लावत कार्यक्रमाची शोभा वाढवली.
या कार्यक्रमास आमदार आसिफ सेठ, आमदार चन्नराज हट्टीहोळी तसेच क्रेडाई कर्नाटकचे अध्यक्ष भास्कर नागेंद्रप्पा यांची प्रमुख उपस्थिती होती. प्रदर्शनातून बांधकाम क्षेत्रातील अत्याधुनिक तंत्रज्ञान, नव्या गृहसंकल्पना आणि बेळगाव शहराचा वेगाने बदलणारा विकास पाहायला मिळत आहे.
यावेळी आमदार चन्नराज हट्टीहोळी यांनी बेळगाव हे गुंतवणुकीसाठी वेगाने पुढे येणारे शहर असल्याचे नमूद केले. रिअल इस्टेट क्षेत्रात गुंतवणूक करण्यासाठी बेळगाव सुरक्षित, विश्वासार्ह आणि दीर्घकालीन लाभ देणारे शहर असल्याचे त्यांनी सांगितले. गुंतवणूकदारांना पोषक वातावरण उपलब्ध करून देण्यास प्रशासन कटिबद्ध असल्याचा विश्वासही त्यांनी व्यक्त केला.
उद्घाटक राहुल जारकीहोळी यांनी आयोजकांचे कौतुक करताना सांगितले की, अशा जागतिक दर्जाच्या प्रदर्शनामुळे स्थानिक नागरिकांना घर खरेदीसाठी मुंबई, पुणे किंवा बेंगळुरूसारख्या शहरांकडे धाव घेण्याची गरज उरलेली नाही. बेळगावमध्ये वाढत असलेले उद्योग आणि रोजगाराच्या संधी पाहता हे प्रदर्शन अत्यंत समयोचित असल्याचे त्यांनी स्पष्ट केले.
अभिनेत्री सोनाली कुलकर्णी हिने बेळगावशी असलेल्या आठवणींना उजाळा देताना गेल्या काही वर्षांत शहराने घेतलेली झपाट्याने झेप उल्लेखनीय असल्याचे सांगितले. घर ही प्रत्येक व्यक्तीच्या आयुष्यातील महत्त्वाची गरज असून, बेलकॉनसारख्या प्रदर्शनामुळे एकाच ठिकाणी विविध पर्याय उपलब्ध होतात, ही बाब कौतुकास्पद असल्याचे तिने नमूद केले.
बेलकॉनचे अध्यक्ष प्रशांत वांडकर यांनी सांगितले की, यंदाच्या प्रदर्शनात भव्य स्टॉल्ससह विविध गृहप्रकल्प, प्लॉट्स, फ्लॅट्स आणि बांधकाम साहित्याची माहिती दिली जात आहे. या माध्यमातून बांधकाम क्षेत्रात मोठी आर्थिक उलाढाल अपेक्षित असून ग्राहकांना तज्ज्ञ मार्गदर्शन आणि सर्व सुविधा एकाच छताखाली मिळत आहेत.
चार दिवस चालणाऱ्या या प्रदर्शनात बांधकाम व्यावसायिक, आर्किटेक्ट्स तसेच बँकिंग क्षेत्रातील तज्ज्ञ उपस्थित राहून मार्गदर्शन करत आहेत. यश इव्हेंट्सचे प्रकाश कालकुंद्रीकर यांच्या सहकार्याने कार्यक्रमाचे उत्कृष्ट नियोजन करण्यात आले आहे. एसबीआयसह नामांकित बँकांचा सहभाग असल्याने गृहकर्ज प्रक्रियाही अधिक सुलभ झाली आहे.
