बेळगाव जिल्ह्यातील गोकाक शहरातील सरकारी रुग्णालयात एका महिलेने एकाच वेळी तीन बाळांना जन्म दिल्याची दुर्मिळ घटना घडली आहे. या घटनेमुळे कुटुंबीयांमध्ये आनंदाचे वातावरण निर्माण झाले आहे.
मूडलगी तालुक्यातील संगणकेरी गावातील २० वर्षीय रेणुका गणाचारी यांनी तिळ्या बाळांना जन्म दिला. गोकाक सरकारी रुग्णालयातील डॉ. श्वेता नाईक आणि वैद्यकीय कर्मचाऱ्यांनी यशस्वीरीत्या प्रसूती करून घेतली.
प्रसूतीनंतर आई आणि तिन्ही नवजात बाळांची प्रकृती स्थिर आणि चांगली असल्याची माहिती देण्यात आली आहे. खबरदारीचा उपाय म्हणून आई व बाळांना डॉक्टरांच्या निरीक्षणाखाली ठेवण्यात आले आहे.
एकाच वेळी तीन बाळांचा जन्म झाल्याची माहिती मिळताच कुटुंबीयांच्या आनंदाला उधाण आले. रुग्णालयातील डॉक्टर, कर्मचारी आणि नातेवाईकांनीही या दुर्मिळ प्रसंगाबद्दल आनंद व्यक्त केला.
Also read
