समाजासाठी अत्यंत कठीण आणि भावनिक परिस्थितीतही अखंडपणे सेवा बजावणाऱ्या स्मशानभूमी कर्मचारी, शववाहिका कर्मचारी तसेच पोस्टमॉर्टेम विभागातील कर्मचाऱ्यांचा बेळगावमध्ये विशेष सत्कार करण्यात आला. शांताई वृद्धाश्रम, चंदन कमल केअर सेंटर आणि विकी मेहता यांच्या संयुक्त पुढाकारातून, माजी महापौर विजय मोरे यांच्या नेतृत्वाखाली हा कृतज्ञता सोहळा पार पडला.
पाई रिसॉर्ट येथे आयोजित कार्यक्रमात समाजाच्या दृष्टीने अत्यंत महत्त्वाची जबाबदारी पार पाडणाऱ्या या कर्मचाऱ्यांना दैनंदिन वापरातील जीवनावश्यक वस्तूंच्या भेटवस्तू देऊन गौरविण्यात आले. त्यांच्या निःस्वार्थ सेवेला मानवंदना देण्याचा हा प्रयत्न असल्याचे आयोजकांनी सांगितले.
कार्यक्रमाला डॉ. माधव प्रभू, जिल्हा आरोग्य अधिकारी डॉ. आय. जी. गडद, बेळगाव महानगरपालिकेचे उपआयुक्त उदयकुमार तलवार, दिनेश वर्नेकर, श्रीपाद पाई आणि विजय कोटी यांची प्रमुख उपस्थिती होती. उपस्थित मान्यवरांनी या कर्मचाऱ्यांच्या समर्पित कार्याचे कौतुक करत अशा उपक्रमांची गरज अधोरेखित केली.
यावेळी माजी महापौर विजय मोरे यांनी स्मशानभूमी, शववाहिका आणि पोस्टमॉर्टेम विभागातील कर्मचारी हे समाजातील खऱ्या अर्थाने पडद्यामागील योद्धे असल्याचे सांगितले. कोणतीही परिस्थिती असो, हे कर्मचारी आपले कर्तव्य प्रामाणिकपणे पार पाडतात. त्यामुळे त्यांना समाजाकडून सन्मान आणि प्रोत्साहन मिळणे आवश्यक असल्याचे त्यांनी नमूद केले.
सत्कार समारंभानंतर सर्व सन्मानित कर्मचारी आणि उपस्थित पाहुण्यांसाठी भोजनाची व्यवस्था करण्यात आली होती.
या कार्यक्रमाला अ‍ॅलन विजय मोरे, अवधूत तुडवेकर, पद्मप्रसाद होळी, गंगाधर पाटील, मायकेल पिंटो, सूरज गावळी यांच्यासह अनेक स्वयंसेवक आणि मान्यवर उपस्थित होते. आभार प्रदर्शनानंतर कार्यक्रमाची सांगता झाली.
