बेळगाव : शहरातील कामत गल्ली परिसरात काही दिवसांपूर्वी झालेल्या आगीच्या दुर्घटनेत पीराजी सावंत यांच्या घराचे मोठ्या प्रमाणावर नुकसान झाले होते. या घटनेमुळे कुटुंबासमोर गंभीर आर्थिक आणि दैनंदिन अडचणी निर्माण झाल्या होत्या.
या पार्श्वभूमीवर मदतीचे आश्वासन पूर्ण करत मृगेंद्रगौडा पाटील फाउंडेशनच्या वतीने सावंत कुटुंबाला जीवनावश्यक साहित्य आणि आर्थिक सहाय्य प्रदान करण्यात आले. यामध्ये राशन किट, बेडशीट तसेच धनादेशाद्वारे आर्थिक मदतीचे वितरण करण्यात आले.
या मदतवाटपाचा कार्यक्रम मृगेंद्रगौडा पाटील यांच्या हस्ते पार पडला. संकटाच्या काळात सामाजिक बांधिलकी जपत गरजू कुटुंबाच्या पाठीशी उभे राहण्याचा हा प्रयत्न असल्याचे यावेळी सांगण्यात आले. स्थानिक नागरिकांनीही या मदतकार्याचे स्वागत करत अशा उपक्रमांमुळे संकटग्रस्त कुटुंबांना आधार मिळत असल्याची भावना व्यक्त केली.
