बेळगाव तालुक्यातील कंग्राळी बि.के. येथील श्री विठ्ठल रुक्मिणी मंदिर कंग्राळी बि.के. येथे आयोजित करण्यात आलेल्या पारायण सोहळ्याची अलीकडेच भक्तिमय वातावरणात सांगता करण्यात आली. संपूर्ण परिसर हरिनामाच्या गजराने दुमदुमून गेला होता.
हा आध्यात्मिक सोहळा ब्रह्मचैतन्य सद्गुरु तात्यासाहेब बाबासाहेब वास्कर यांच्या आशीर्वादाने पार पडला. पारायणाच्या निमित्ताने विविध धार्मिक कार्यक्रमांचे आयोजन करण्यात आले होते. कीर्तन, प्रवचन आणि हरिपाठाद्वारे भक्तांना अध्यात्मिक मार्गदर्शन मिळाले.
कर्नाटक आणि महाराष्ट्रासह पंढरपूर, कोल्हापूर, सांगली व बेळगाव परिसरातून कीर्तनकार आणि प्रवचनकार सहभागी झाले होते. हरिभक्त परायण (ह.भ.प.) राजू कावळे यांनी प्रभावी काला कीर्तन सादर केले, तर ह.भ.प. गोपाळ महादेव पाटील गुरुजी यांनीही भक्तिमय कीर्तनातून उपस्थितांना मंत्रमुग्ध केले.
कार्यक्रम यशस्वी करण्यासाठी पारायण मंडळ, वारकरी मंडळ तसेच महिला भक्तवर्ग यांनी विशेष परिश्रम घेतले. होनगा, बेकनहळ्ळी, कुडची, ज्योतीनगर, खासबाग, सानगाव आदी परिसरातील वारकऱ्यांनी मोठ्या संख्येने उपस्थित राहून सहकार्य केले. संपूर्ण सोहळा खेळीमेळीच्या आणि भक्तीमय वातावरणात पार पडला.
