बेळगाव : राज्यातील रेशन वितरण व्यवस्थेमध्ये वारंवार उद्भवणाऱ्या सर्व्हर समस्येमुळे रेशन दुकानदार आणि नागरिक दोघेही हैराण झाले असून, या पार्श्वभूमीवर कर्नाटक राज्य सरकारी रेशन दुकानमालक संघटनेच्या पदाधिकाऱ्यांनी सोमवारी जिल्हाधिकाऱ्यांची भेट घेऊन विविध मागण्यांचे निवेदन सादर केले.
मे आणि जून महिन्याचा तांदूळ केंद्र सरकारकडून एकत्रितपणे वितरित करण्यात येत असल्याने रेशन कार्डधारकांना दोन वेळा बायोमेट्रिक पडताळणी करावी लागत आहे. मात्र, तांत्रिक अडचणी आणि सतत सर्व्हर डाऊन राहत असल्याने वितरण प्रक्रियेला मोठा फटका बसत असल्याची माहिती दुकानदारांनी प्रशासनाला दिली.
रेशन दुकानांमध्ये नागरिकांच्या लांबच लांब रांगा लागत असून अनेकांना तासन्तास प्रतीक्षा करावी लागत आहे. त्यामुळे ग्राहकांमध्ये नाराजी वाढत असून त्याचा रोष दुकानदारांना सहन करावा लागत असल्याचे संघटनेच्या प्रतिनिधींनी सांगितले.
तसेच, सर्व्हरची समस्या तातडीने सोडवून रेशन वितरण सुरळीत करावे, बायोमेट्रिक प्रक्रियेत सुधारणा करावी आणि दुकानदारांसह ग्राहकांना होणारा त्रास थांबवण्यासाठी प्रशासनाने त्वरित उपाययोजना कराव्यात, अशी मागणी निवेदनाद्वारे करण्यात आली.
