बेळगाव : केंद्र सरकारने घरगुती तसेच वाणिज्यिक एलपीजी गॅस सिलेंडरच्या दरात केलेल्या वाढीच्या निषेधार्थ बेळगावात काँग्रेस पक्षाच्या वतीने आंदोलन करण्यात आले. हे आंदोलन बेळगाव येथील काँग्रेस भवनासमोर पार पडले.
काँग्रेस ग्रामीण जिल्हाध्यक्ष तसेच पंच गॅरंटी योजना अंमलबजावणी समितीचे जिल्हाध्यक्ष विनय नवलगट्टी यांच्या नेतृत्वाखाली हे आंदोलन आयोजित करण्यात आले. यावेळी केंद्र सरकारच्या धोरणांविरोधात घोषणाबाजी करत दरवाढ तात्काळ मागे घ्यावी, अशी मागणी करण्यात आली.
या आंदोलनात काँग्रेसचे विविध पदाधिकारी व कार्यकर्ते सहभागी झाले होते. त्यामध्ये प्रदीप एम., जी. राजा सलीम, मनसूरअली अत्तार, ललिता माने, रोहिणी, जयश्री माळीगे, कस्तुरी यांसह अनेक काँग्रेस नेते व कार्यकर्ते उपस्थित होते.
दरवाढीमुळे सामान्य नागरिक, गृहिणी आणि व्यावसायिकांवर आर्थिक ताण वाढत असल्याचा आरोप आंदोलनकर्त्यांनी केला. केंद्र सरकारने तातडीने गॅस दरवाढ मागे घेऊन जनतेला दिलासा द्यावा, अशी मागणीही यावेळी करण्यात आली.
