निपाणी | प्रतिनिधी
निपाणी येथे 21 डिसेंबर 2025 रोजी आयोजित करण्यात आलेल्या गोल्ड प्लस रसाई हिल्स मॅरेथॉन 2025 स्पर्धेत बेळगावचा क्रीडाप्रेम आणि शिस्तबद्ध जीवनशैलीचा अभिमानास्पद प्रत्यय पुन्हा एकदा आला. या मॅरेथॉनमध्ये बेळगावच्या हिंडलगा परिसरातील रहिवासी, निवृत्त सुभेदार मेजर व ऑनररी कॅप्टन चंद्रकांत कडोलकर यांनी उल्लेखनीय कामगिरी करत 56 वर्षावरील गटात 10 किलोमीटर धावण्याच्या स्पर्धेत द्वितीय क्रमांक पटकावला.
या मॅरेथॉन स्पर्धेत विविध वयोगटांतील असंख्य स्पर्धकांनी सहभाग नोंदवला होता. कठीण ट्रॅक आणि आव्हानात्मक वातावरणातही चंद्रकांत कडोलकर यांनी जिद्द, शिस्त आणि सातत्याच्या जोरावर उत्कृष्ट धावपटू म्हणून आपली छाप उमटवली.
सेनादलातील प्रदीर्घ सेवेनंतरही फिटनेस आणि क्रीडाक्षेत्राशी नाते जपणाऱ्या कडोलकर यांच्या या यशाबद्दल बेळगाव शहरातून त्यांच्यावर कौतुकाचा वर्षाव होत आहे. अनेक नागरिक, माजी सैनिक संघटना आणि क्रीडाप्रेमींनी त्यांचे अभिनंदन करत तरुणांसाठी ते प्रेरणास्थान असल्याचे मत व्यक्त केले.
