बेळगावात महाराष्ट्र एकीकरण युवा समितीच्या कार्यकर्त्यासोबत घेतलेल्या सेल्फीमुळे निर्माण झालेल्या वादाचा फटका अखेर पोलीस निरीक्षकाला बसला आहे. माळमारुती पोलीस ठाण्याचे निरीक्षक जे. एम. कालीमिर्ची यांची बदली करण्यात आली असून त्यांच्या जागी बी. आर. गडेकर यांची नियुक्ती करण्यात आली आहे.
ही कारवाई १ नोव्हेंबर रोजी ‘काळा दिवस’ आंदोलनाच्या पार्श्वभूमीवर झालेल्या वादग्रस्त घटनेनंतर करण्यात आली. महाराष्ट्र एकीकरण युवा समिती सीमाभागचे अध्यक्ष शुभम शेळके यांच्यासोबत पोलीस निरीक्षक कालीमिर्ची यांनी घेतलेला सेल्फी सोशल मीडियावर व्हायरल झाल्यानंतर कन्नड संघटनांकडून तीव्र संताप व्यक्त करण्यात आला होता.
या घटनेनंतर विविध कन्नड संघटनांनी कालीमिर्ची यांच्या विरोधात निदर्शने करून कारवाईची मागणी केली होती. अखेर पोलीस विभागाने बदलीचे आदेश जारी केले असून, ही बदली ‘सेल्फी प्रकरणाशी संबंधित कारवाई’ असल्याची चर्चा पोलिस वर्तुळात जोरात सुरू आहे.
दरम्यान, नवीन निरीक्षक म्हणून बी. आर. गडेकर यांनी पदभार स्वीकारला असून, त्यांनी “शिस्त आणि समन्वय राखणे हीच प्राथमिकता असेल,” असे सांगितले.
