बेंगळुरू : कर्नाटकातील सत्ताधारी काँग्रेसमध्ये गेल्या काही महिन्यांपासून सुरू असलेल्या नेतृत्व बदलाच्या चर्चांना आता नवे वळण मिळण्याची शक्यता निर्माण झाली आहे. मुख्यमंत्री सिद्धरामय्या यांनी गुरुवारी सकाळी आपल्या अधिकृत निवासस्थानी मंत्रीमंडळासाठी विशेष उपहार बैठक आयोजित केली असून या बैठकीकडे राज्याच्या राजकीय वर्तुळाचे लक्ष लागले आहे.
उपमुख्यमंत्री डी के शिवकुमार हे दिल्ली दौरा आटोपून गुरुवारी पहाटे बंगळुरूत दाखल होणार असून विमानतळावरून थेट मुख्यमंत्री निवासस्थानी जाणार असल्याची माहिती त्यांच्या अधिकृत दौरा पत्रकातून समोर आली आहे.
राजकीय सूत्रांच्या माहितीनुसार, या बैठकीनंतर मुख्यमंत्री सिद्धरामय्या राज्यपालांची भेट घेऊन पुढील राजकीय निर्णय जाहीर करण्याची शक्यता वर्तवली जात आहे. त्यानंतर संध्याकाळी काँग्रेस विधायक दलाची बैठक घेण्यात येऊ शकते. या बैठकीत नवीन विधायक दल नेत्याची निवड होण्याचीही चर्चा राजकीय वर्तुळात रंगली आहे.
गेल्या वर्षभरापासून कर्नाटक काँग्रेसमध्ये नेतृत्व बदलाबाबत अनेक तर्क-वितर्क सुरू होते. आता अचानक वाढलेल्या बैठका, दिल्लीतील हालचाली आणि वरिष्ठ नेत्यांचे दौरे यामुळे राज्यात मोठ्या राजकीय बदलाचे संकेत स्पष्ट होत असल्याचे मानले जात आहे.
