बेळगाव तालुक्यातील कंग्राळी बी. के. गावात सार्वजनिक ठिकाणी अंमली पदार्थांची विक्री करणाऱ्या दोन युवकांना सीसीबी पोलिसांनी सापळा रचून अटक केली. आरोपींकडून सुमारे एक लाख रुपयांच्या गांजासह मोबाईल फोन असा एकूण 1,00,700 रुपयांचा मुद्देमाल जप्त करण्यात आला आहे.
अटक करण्यात आलेल्या संशयितांची नावे कार्तिक भरत चिखलकर (वय 29, रा. कंग्राळी बी. के.) आणि प्रकाश अर्जुन बगारी (वय 20, रा. मुचंडी) अशी आहेत. हे दोघेही लक्ष्मी गल्ली परिसरात गांजाची विक्री करत असल्याची माहिती मिळताच सीसीबीचे पोलीस निरीक्षक मंजुनाथ नायक यांच्या पथकाने धाड टाकली. कारवाईदरम्यान आरोपींना रंगेहात पकडण्यात आले.
पोलिसांनी आरोपींकडून सुमारे 1 किलो 920 ग्रॅम गांजा आणि एक मोबाईल फोन जप्त केला. या प्रकरणी संबंधितांविरुद्ध गुन्हा नोंदवून पुढील तपास सुरू आहे.
दरम्यान, शहरातील मार्केट पोलीस ठाण्याच्या पथकाने स्वतंत्र कारवाई करत मटका जुगारावर धाड टाकली. या कारवाईत तिघा जणांना अटक करण्यात आली असून जुगाराचे साहित्य जप्त करण्यात आले आहे. अटक करण्यात आलेल्यांमध्ये रियाज घीवाले, सुलेमान अत्तार आणि फईम कोतवाल यांचा समावेश आहे.
तसेच, बागवान गल्ली परिसरात गांजाच्या नशेत असामान्य वर्तन करणाऱ्या एका व्यक्तीला पोलिसांनी ताब्यात घेतले. त्याच्याविरुद्धही कायदेशीर कारवाई करण्यात आली आहे.
बेळगाव शहरात अंमली पदार्थ व अवैध जुगाराविरोधात पोलिसांनी कारवाया तीव्र केल्याचे या घटनांवरून स्पष्ट होत आहे.
