शहरातील कायदा व सुव्यवस्था अधिक सक्षम करण्याच्या उद्देशाने सिटी आर्म्ड रिझर्व्ह (CAR) पोलिस दलासाठी आधुनिक सुविधांनी सुसज्ज नव्या इमारतीच्या उभारणीस प्रारंभ झाला आहे. कंग्राळी (के.एच.) येथे सुमारे ₹5 कोटींच्या खर्चातून उभारण्यात येणाऱ्या या प्रकल्पाचे भूमिपूजन बेळगाव उत्तर मतदारसंघाचे आमदार आसिफ (राजू) सेठ यांच्या हस्ते करण्यात आले.
या कार्यक्रमाला बेळगाव शहराचे पोलिस आयुक्त भूषण गुलाबराव बोरसे, वरिष्ठ पोलिस अधिकारी, लोकप्रतिनिधी आणि परिसरातील नागरिक मोठ्या संख्येने उपस्थित होते.
यावेळी बोलताना आमदार आसिफ (राजू) सेठ यांनी पोलिस यंत्रणा सक्षम करण्यासाठी दर्जेदार पायाभूत सुविधा उभारणे ही काळाची गरज असल्याचे सांगितले. नागरिकांच्या सुरक्षेसाठी कार्यरत असलेल्या पोलिसांना आधुनिक आणि प्रशस्त कार्यस्थळ उपलब्ध झाल्यास त्यांच्या कामकाजात अधिक कार्यक्षमता येईल, असा विश्वास त्यांनी व्यक्त केला.
प्रस्तावित इमारतीमुळे सिटी आर्म्ड रिझर्व्ह पोलिस दलाच्या प्रशासकीय कामकाजाला गती मिळण्याबरोबरच जवानांसाठी अधिक चांगल्या सुविधा उपलब्ध होतील. भविष्यातील गरजा लक्षात घेऊन हा प्रकल्प उभारला जात असून त्यामुळे पोलिस दलाची कार्यक्षमता आणि सज्जता अधिक बळकट होणार असल्याचेही यावेळी नमूद करण्यात आले.
