बेळगाव : पत्रकारितेतील छायाचित्रण क्षेत्रात गेल्या 25 वर्षांपासून उल्लेखनीय योगदान देणारे बेळगावचे ज्येष्ठ पत्रकार छायाचित्रकार पी.के. बडिगेर यांना प्रतिष्ठेचा ‘कर्नाटक छाया रत्न’ पुरस्कार प्रदान करण्यात येणार आहे.
हा पुरस्कार वितरण सोहळा 12 जून रोजी सकाळी 10 वाजता बंगळुरू येथील पॅलेस ग्राउंडच्या त्रिपुरा वासिनी येथे आयोजित करण्यात आलेल्या आंतरराष्ट्रीय स्तरावरील ‘फोटो टुडे’ छायाचित्र प्रदर्शनात होणार आहे.
पी.के. बडिगेर यांनी आपल्या कॅमेऱ्याच्या माध्यमातून समाजातील विविध प्रश्न, सामान्य नागरिकांच्या समस्या, सामाजिक घडामोडी, राजकीय घटना तसेच विविध क्षेत्रातील महत्त्वाचे क्षण प्रभावीपणे टिपले आहेत.
पत्रकारिता क्षेत्रातील त्यांच्या सातत्यपूर्ण आणि उल्लेखनीय सेवेसाठी त्यांची या पुरस्कारासाठी निवड करण्यात आली आहे. त्यांच्या या सन्मानामुळे बेळगावच्या पत्रकारिता क्षेत्रात आनंदाचे वातावरण निर्माण झाले आहे.
