बेळगाव : सार्वजनिक गणेशोत्सवाला विधायक आणि सामाजिक उपक्रमांची जोड देणाऱ्या बेळगाव श्री गणेश फेस्टिवलला रविवारी उत्साहपूर्ण वातावरणात प्रारंभ झाला. श्री माता सोसायटीचे चेअरमन मनोहर देसाई यांच्या संकल्पनेतून गेल्या २८ वर्षांपासून आयोजित करण्यात येणाऱ्या या फेस्टिवलचे यंदाचे आयोजन ६ ते ९ सप्टेंबर दरम्यान करण्यात आले आहे.
फेस्टिवलच्या पहिल्या दिवशी महिलांसाठी विशेष मिलेट्स अर्थात तृणधान्यांपासून गोड आणि तिखट पदार्थ बनविण्याची पाककला स्पर्धा घेण्यात आली. या स्पर्धेला बेळगावातील महिलांचा उत्स्फूर्त प्रतिसाद मिळाला.
कार्यक्रमाच्या प्रारंभी राजमाता सोसायटीच्या चेअरमन मनोरमा देसाई आणि भक्ती सोसायटीच्या चेअरमन ज्योती अग्रवाल यांच्या हस्ते श्री गणेश पूजन करण्यात आले. त्यानंतर डॉ. मीना पाटील, प्रतिभा नेगिनहाळ आणि प्राचार्या प्रेमलता पाटील यांच्या हस्ते दीपप्रज्वलन करून फेस्टिवलचे औपचारिक उद्घाटन करण्यात आले.
ज्योती अग्रवाल यांनी उपस्थितांचे स्वागत करत गणेश फेस्टिवलच्या आयोजनामागील उद्देश आणि उपक्रमांची माहिती दिली. प्रतिभा नेगिनहाळ यांनी स्पर्धकांना स्पर्धेचे नियम व निकष समजावून सांगितले. पाककला स्पर्धेचे परीक्षण रुपांजली भोसले आणि प्रतिभा माने यांनी केले.
तृणधान्यांपासून तयार केले विविध पदार्थ
मिलेट्सच्या वापराला प्रोत्साहन देण्याच्या उद्देशाने आयोजित या स्पर्धेत तब्बल ४५ महिला स्पर्धकांनी सहभाग घेतला. राळा, भगर, बाजरी, राजगिरा, नाचणी, चेना, कुठळी, कोदरा, कोराळे आणि ज्वारी यांसारख्या तृणधान्यांपासून स्पर्धकांनी विविध पारंपरिक तसेच आधुनिक पदार्थ तयार करून सादर केले.
तिखट पदार्थांमध्ये वरीचे पदार्थ, धपाटे, राजगिरा भेळ, नूडल्स, सूप, मोमोज, ज्वारीची खिचडी, वडे, बाजरी कबाब, नाचणी चकली, कटलेट, थेपले आणि अप्पे यांचा समावेश होता.
तर गोड पदार्थांच्या विभागात मोतीचूर रबडी, गुलकंद मोदक, बदाम केक, नाचणी केक, बर्फी, करंजी, आंबील आणि विविध प्रकारचे लाडू अशा पदार्थांनी स्पर्धकांनी उपस्थितांचे लक्ष वेधले.
अनिशा मांगले, दीपा घसारी ठरल्या अव्वल
पाककला स्पर्धेच्या तिखट पदार्थ विभागात अनिशा मांगले यांनी प्रथम क्रमांक पटकावला. रश्मी भराठे यांनी द्वितीय, तर रेखा देशपांडे यांनी तृतीय क्रमांक मिळवला.
गोड पदार्थ विभागात दीपा घसारी यांनी प्रथम क्रमांक मिळवला. गीता जुवेकर यांनी द्वितीय, तर रेखा देशपांडे यांनी तृतीय क्रमांक पटकावला.
महिलांच्या पाककौशल्याला व्यासपीठ देण्यासोबतच तृणधान्यांच्या आरोग्यदायी वापराबाबत जनजागृती करण्याचा संदेश या स्पर्धेतून देण्यात आला.
उद्या रंगणार रांगोळी स्पर्धा
गणेश फेस्टिवलच्या दुसऱ्या दिवशी, सोमवार, ७ सप्टेंबर रोजी महिलांसाठी रांगोळी स्पर्धेचे आयोजन करण्यात आले आहे. ही स्पर्धा १८ वर्षांवरील आणि १८ वर्षांखालील अशा दोन गटांत होणार आहे.
स्पर्धकांनी रांगोळीचे साहित्य घरून आणणे आवश्यक असून, स्पर्धेच्या ठिकाणी केवळ रांगोळी काढायची आहे.
पाककला आणि रांगोळी स्पर्धांचे आयोजन शास्त्रीनगर येथील ज्ञान मंदिर इंग्रजी माध्यम शाळेत दुपारी २.३० वाजता करण्यात येणार आहे.
गणेशोत्सवाच्या पारंपरिक भक्तिमय वातावरणासोबत महिलांच्या कलागुणांना, सर्जनशीलतेला आणि आरोग्यदायी आहाराच्या संकल्पनेला व्यासपीठ देणारा हा फेस्टिवल यंदाही बेळगावकरांसाठी आकर्षणाचे केंद्र ठरणार आहे.
