विद्यार्थ्यांमधील रक्ताल्पता ओळखून त्यावर वेळेत उपचार व जनजागृती व्हावी या उद्देशाने रोटरी क्लब ऑफ बेळगाव दर्पणच्या पुढाकारातून सेंट अँथनीज स्कूल येथे दोन दिवसीय अॅनिमिया तपासणी शिबिराचे यशस्वी आयोजन करण्यात आले. या उपक्रमात 400 हून अधिक विद्यार्थ्यांची हिमोग्लोबिन तपासणी करण्यात आली.
हॅपी हार्ट फाउंडेशन आणि श्री ऑर्थो ट्रॉमा केअर सेंटर, बेळगावी यांच्या सहकार्याने आयोजित या शिबिरात विद्यार्थ्यांच्या आरोग्याची प्राथमिक तपासणी करण्यात आली. रक्ताल्पतेचे लवकर निदान झाल्यास योग्य उपचार आणि आवश्यक आरोग्य मार्गदर्शन वेळेत मिळू शकते, या उद्देशाने हा उपक्रम राबविण्यात आला.
शिबिराला विद्यार्थी, पालक, शाळेचे व्यवस्थापन तसेच वैद्यकीय तज्ज्ञांचा उत्स्फूर्त प्रतिसाद मिळाला.
प्रतिबंधात्मक आरोग्यसेवा आणि आरोग्यविषयक जनजागृती यांना प्राधान्य देत समाजाच्या निरोगी भविष्यासाठी अशा उपक्रमांची आवश्यकता असल्याचे यावेळी अधोरेखित करण्यात आले.
या उपक्रमाच्या यशस्वी आयोजनासाठी हॅपी हार्ट फाउंडेशन, श्री ऑर्थो ट्रॉमा केअर सेंटर, सेंट अँथनीज स्कूलचे व्यवस्थापन, डॉक्टर, आरोग्य कर्मचारी, स्वयंसेवक आणि रोटरी सदस्यांचे विशेष योगदान लाभले.
रोटरी क्लब ऑफ बेळगाव दर्पणच्या अध्यक्षा रोटे. डॉ. स्फूर्ती मस्तीहोळी, सचिव रोटे. ज्योती कुलकर्णी आणि कार्यक्रम अध्यक्षा रोटे. डॉ. स्मृती प्रधान यांनी सर्व सहकार्यकर्त्यांचे आभार मानत भविष्यातही समाजहिताचे आरोग्यविषयक उपक्रम सातत्याने राबविण्याचा निर्धार व्यक्त केला.
