ऊर्जा संवर्धनाचा संदेश देणारी ‘सक्षम’ सायक्लोथॉन; बेळगावात इंडियन ऑइलकडून जनजागृती उपक्रम
बेळगाव | प्रतिनिधी
देशभरात ऊर्जा संवर्धनाबाबत जनजागृती करण्याच्या उद्देशाने पेट्रोलियम आणि नैसर्गिक वायू मंत्रालयाच्या वतीने दरवर्षी सक्षम (Sanrakshan Kshamata Mahotsav) हा विशेष उपक्रम राबवला जातो. याच उपक्रमांतर्गत यंदा १ ते १५ फेब्रुवारी २०२६ या कालावधीत सक्षम पंधरवडा साजरा करण्यात येत आहे.
या मोहिमेचा भाग म्हणून इंडियन ऑइल कॉर्पोरेशन लिमिटेड, बेळगाव विभागीय कार्यालयाच्या वतीने रविवारी (८ फेब्रुवारी २०२६) सायक्लोथॉनचे आयोजन करण्यात आले. ऊर्जा बचत आणि इंधन संवर्धनाचा संदेश देणाऱ्या या सायक्लोथॉनमध्ये सुमारे ७० ते ८० नागरिकांनी उत्स्फूर्त सहभाग नोंदवला.
या उपक्रमाचा शुभारंभ इंडियन ऑइलचे वरिष्ठ व्यवस्थापक (रिटेल सेल्स) श्री. सतीश यांच्या हस्ते हिरवा झेंडा दाखवून करण्यात आला. सायक्लोथॉनदरम्यान सहभागी नागरिकांनी इंधन बचत, ऊर्जा कार्यक्षमता आणि पर्यावरण संरक्षणासंबंधी विविध घोषवाक्ये फलकांद्वारे प्रदर्शित केली. संपूर्ण मार्गावर ऊर्जा संवर्धनाचा प्रभावी संदेश देत घोषणाबाजी करण्यात आली.
ऊर्जेचा विवेकपूर्ण वापर करणे ही काळाची गरज असून, अशा उपक्रमांमुळे समाजात सकारात्मक बदल घडून येतो, असे मत यावेळी उपस्थित अधिकाऱ्यांनी व्यक्त केले. सक्षम मोहिमेअंतर्गत राबवण्यात येणारे उपक्रम नागरिकांमध्ये जागरूकता निर्माण करण्यास मोलाचे ठरत असल्याचेही सांगण्यात आले.
