राष्ट्रीय स्वयंसेवक संघाच्या अखिल भारतीय प्रांत प्रचारकांच्या बैठकीला आजपासून बेळगावात प्रारंभ झाला. सरसंघचालक डॉ. मोहन भागवत, सहकार्यवाह दत्तात्रय होसबाळे यांच्या प्रमुख उपस्थितीत ही तीन दिवस बैठक चालणार आहे.
क्षेत्र प्रचारक, सह क्षेत्र प्रचारक, प्रांत प्रचारक असे एकूण संघाच्या 46 प्रांताचे प्रमुख बैठकीला उपस्थित आहेत. या बरोबरच संघाशी संबंधित संस्थांचे संघटन मंत्री देखील बैठकीत सहभागी झाले आहेत. संघातर्फे वेगवेगळ्या पातळीवर आयोजित करण्यात आलेल्या प्रशिक्षण शिबिराचा आणि संघाच्या शाखेत राबविण्यात येणाऱ्या योजनावर बैठकीत चर्चा होणार आहे.
आगामी काळात संघाच्या शाखा वाढविण्याच्या दृष्टिने बैठकीत विचार विनिमय केला जाणार आहे. संघाच्या शताब्दी पूर्ती निमित्त आयोजित करण्यात आलेले कार्यक्रम आणि पुढील काळात करायचे कार्यक्रम याविषयी चर्चा आणि नियोजन केले जाणार आहे.
सरसंघचालकांच्या पुढील वर्षातील प्रवास यावर देखील चर्चा बैठकीत होणार आहे. बेळगावात होत असलेल्या राष्ट्रीय स्वयंसेवक संघाच्या अखिल भारतीय प्रांत प्रचारकांच्या बैठकीच्या ठिकाणी मोठा पोलीस बंदोबस्त ठेवण्यात आला असून त्या परिसरात कोणालाही प्रवेश दिला जात नाही.
