बेळगाव प्रतिनिधी
बेळगाव कॅन्टोन्मेंट बोर्डाच्या नवनियुक्त अध्यक्षपदाची सूत्रे स्वीकारल्यानंतर ब्रिगेडियर गिरीश उपाध्ये यांनी तातडीने प्रशासकीय कामकाजाचा आढावा घेत शहरातील मूलभूत समस्यांवर अधिकाऱ्यांना स्पष्ट आणि कडक निर्देश दिले. सोमवारी कॅन्टोन्मेंट सभागृहात झालेल्या प्रगती आढावा बैठकीत रस्त्यांची दुरवस्था, प्लास्टिकमुक्त मोहीम आणि घनकचरा व्यवस्थापन हे प्रमुख मुद्दे चर्चेत राहिले.
बैठकीदरम्यान मुख्य कार्यकारी अधिकारी मंचलवार हरीविजय यांनी एल अँड टी कंपनीकडून विविध भागांत करण्यात आलेल्या खोदाईनंतर रस्ते अर्धवट अवस्थेत सोडल्याचा मुद्दा उपस्थित केला. यामुळे नागरिकांना मोठा त्रास सहन करावा लागत असून अपघातांचा धोका वाढल्याचेही त्यांनी निदर्शनास आणून दिले.
या बाबीची गंभीर दखल घेत ब्रिगेडियर उपाध्ये यांनी संबंधित अधिकाऱ्यांना तत्काळ कार्यवाहीचे आदेश देत सर्व खोदलेले रस्ते तातडीने दुरुस्त करण्याच्या सूचना दिल्या. नागरिकांच्या सुरक्षेशी कोणतीही तडजोड सहन केली जाणार नसल्याचे त्यांनी स्पष्ट केले.
याशिवाय कॅन्टोन्मेंट परिसर प्लास्टिकमुक्त करण्यासाठी व्यापक जनजागृती मोहीम राबवण्यावर भर देण्यात आला. असद खान दर्ग्यासह विविध पर्यटनस्थळी “प्लास्टिकमुक्त कॅन्टोन्मेंट” असे फलक उभारण्याच्या सूचनाही बैठकीत देण्यात आल्या.
घनकचरा व्यवस्थापन अधिक सक्षम करण्यासाठी कचरा संकलन आणि स्वच्छतेच्या कामांची नियमित तपासणी करण्याचे आदेश देत अधिकाऱ्यांनी आपल्या विभागातील स्वच्छतेकडे विशेष लक्ष द्यावे, असे ब्रिगेडियर उपाध्ये यांनी सांगितले.
दरम्यान, बेळगाव उत्तरचे आमदार Asif (Raju) Sait यांनी ब्रिगेडियर गिरीश उपाध्ये यांचे स्वागत करत कॅन्टोन्मेंट परिसरातील विकासकामांना गती मिळेल, असा विश्वास व्यक्त केला.
