यल्लोजीराव पाटील यांचा अनोखा उपक्रम! चार वर्षांपासून दिवाळीला गौरव धन कर्मचाऱ्यांसाठी
कंग्राळी बीके (ता. बेळगाव):
ग्रामपंचायत क्षेत्रात कार्यरत कर्मचाऱ्यांच्या मेहनतीचा गौरव करण्याची परंपरा गेल्या चार वर्षांपासून माजी उपसरपंच व विद्यमान सदस्य यल्लोजीराव पाटील यांनी कायम ठेवली आहे.
दिवाळीच्या पार्श्वभूमीवर ते दरवर्षी स्वतःला मिळणारे ‘गौरव धन’ ग्रामपंचायतीत काम करणाऱ्या कर्मचाऱ्यांना देऊन एक आगळावेगळा संदेश देतात. यावर्षीदेखील त्यांनी ग्रामपंचायतीतील अधिकारी, सफाई कर्मचारी व इतर कर्मचाऱ्यांना कपडे व मिठाईचे वाटप करून सणाचा आनंद द्विगुणित केला.
या उपक्रमामुळे संपूर्ण ग्रामपंचायतीत उत्साहाचे वातावरण पसरले असून कर्मचाऱ्यांनी यल्लोजीराव पाटील यांचे आभार मानले.
यावेळी ग्रामपंचायत सदस्य नवनाथ पुजारी, बाबू दोडमणी, तसेच कर्मचारी उपस्थित होते.
पाच वर्षे सलग सुरू असलेल्या या उपक्रमामुळे सामाजिक बांधिलकी आणि मानवी संवेदनांचा उत्कृष्ट आदर्श उभा राहिला आहे. गावाच्या विकासाबरोबरच कर्मचाऱ्यांच्या आनंदाचीही जबाबदारी घेणारा हा उपक्रम सर्वांसाठी प्रेरणादायी ठरत आहे.
