बेळगाव शहरात भगवान महावीर जयंती उत्साहात साजरी करण्यात आली. यानिमित्ताने शहरातून भव्य आणि आकर्षक शोभायात्रेचे आयोजन करण्यात आले होते. संपूर्ण वातावरण भक्तीमय झाले होते.
या शोभायात्रेत भगवान महावीरांच्या जीवनातील विविध महत्त्वपूर्ण प्रसंगांचे सुंदर सादरीकरण चित्ररथांच्या माध्यमातून करण्यात आले होते. या देखाव्यांनी उपस्थितांचे लक्ष वेधून घेतले.
शहरातील प्रमुख मार्गांवर शोभायात्रेच्या स्वागतासाठी रस्त्याच्या दुतर्फा झेंडे लावण्यात आले होते. महिला व तरुणींनी रस्त्यावर विविध रंगीबेरंगी रांगोळ्या काढून कार्यक्रमाची शोभा अधिकच वाढवली.
मिरवणुकीच्या अग्रभागी सजवलेल्या रथावर भगवान महावीरांची भव्य मूर्ती विराजमान करण्यात आली होती. टिळक चौक येथे जैन समाजातील मान्यवरांच्या हस्ते पूजन करून शोभायात्रेला शुभारंभ करण्यात आला.
यावेळी पारंपरिक वेशभूषेत सजलेल्या लहान मुली आणि झाँज पथकाने उपस्थितांचे विशेष लक्ष वेधून घेतले. कडक उन्हाचा विचार करून जैन समाजाच्या वतीने मार्गावर ठिकठिकाणी थंड दूध, ताक, सरबत आणि लस्सीचे वितरण करण्यात आले.
महावीर भवन येथे या शोभायात्रेची सांगता करण्यात आली.
