बेळगांव:मोबाईलच्या आक्रमणामुळे विस्मरणात चाललेल्या लहानपणीच्या पारंपरिक खेळांचे आयोजन आमदार अभय पाटील यांनी केले होते. गोट्या, लगोरी, भोगरा, आंधळी कोशिंबीर, टायर पळवणे, विटी दांडू, रिंग पळवणे इत्यादी खेळांचा आनंद कर्नाटक विधानसभेचे सभापती यु. टी. खादर यांच्यासह अनेकांनी घेतला.
बेळगावातील लेले ग्राऊंडवर या लहानपणीच्या खेळाचे आयोजन करण्यात आले होते. या आगळ्यावेगळ्या उपक्रमाचे उदघाटन कर्नाटक विधानसभेचे सभापती यु. टी. खादर यांनी केले. सभापती खादर यांनी उदघाटन करून गोट्या खेळण्याचा आनंद घेतला. त्यानंतर आमदार अभय पाटील यांच्या समवेत टायर पळवण्याच्या खेळात सहभागी झाले.अनेक आमदारांनी देखील लहानपणाच्या खेळात सहभागी होऊन रम्य ते बालपणच्या आठवणीना उजाळा दिला. उद घाटन झाल्यावर अनेकानी आपल्या मुलांच्या आणि नातवंडाच्या समवेत खेळ खेळून बालपणीच्या स्मृतीना जागवले.
सकाळी सात वाजल्यापासून दुपारी दोन वाजेपर्यंत लेले ग्राउंडवर लोकांनी बालपणीच्या खेळांचा आनंद लुटला.मोबाईल आणि सोशल मीडियामुळे पूर्वी खेळले जात असलेले खेळ लोकांच्या विस्मृतीत जात आहेत. लहान मुले आणि तरुण पिढी यांना या खेळांची माहिती व्हावी. हे खेळ खेळून सर्वांगीण विकास व्हावा. एकाच जागी बसून मोबाईल घेऊन बसण्याची सवय बंद पडावी या उद्देशाने लहानपणीच्या खेळांचे आयोजन केल्याची माहिती आमदार अभय पाटील यांनी दिली.
