बेळगाव (प्रतिनिधी):
शहरात वाढत असलेल्या ध्वनिप्रदूषणावर नियंत्रण मिळवण्यासाठी बेळगाव वाहतूक पोलिसांनी मोठी मोहीम हाती घेतली आहे. या मोहिमेदरम्यान १०० हून अधिक कर्कश आणि बेकायदेशीर सायलेंसर जप्त करून रोडरोलरखाली चिरडून नष्ट करण्यात आले.
एसीपी शिवाजीराव निकम यांच्या मार्गदर्शनाखाली पार पडलेल्या या कारवाईत शहरातील विविध भागांमध्ये धडक मोहीम राबविण्यात आली. अनेक दुचाकीधारकांनी आपल्या वाहनांवर अत्याधिक आवाज निर्माण करणारे सुधारित सायलेंसर बसवले होते, जे नागरिकांच्या शांततेला आणि पर्यावरणालाही हानीकारक ठरत होते.
जप्त केलेले सर्व सायलेंसर वाहतूक विभागाच्या आवारात जमा करून रोडरोलरच्या सहाय्याने चिरडून पूर्णतः नष्ट करण्यात आले. कारवाईच्या वेळी विभागातील सीपीआय, पीएसआय तसेच इतर अधिकारी उपस्थित होते.
https://youtube.com/shorts/44HMurZ289M?si=cIQuiqj8BlZOqLqh
पोलिसांनी स्पष्ट इशारा दिला आहे की, अशा प्रकारचे सायलेंसर पुन्हा वाहनांवर बसवताना कोणी आढळल्यास त्यांच्या विरोधात कठोर कायदेशीर कारवाई केली जाणार आहे.
वाहतूक विभागाने नागरिकांना आवाहन केले आहे की, वाहतूक नियमांचे काटेकोर पालन करा आणि शहरातील शांततेसाठी प्रशासनाला सहकार्य करा. ध्वनिप्रदूषणविरोधी ही मोहीम आगामी काळातही सुरू राहणार आहे.
