बेळगाव : डी मीडिया
प्रयास इव्हेंट अँड एक्झिबिशन, नवी दिल्ली यांच्या वतीने आयोजित करण्यात आलेल्या ‘2 व्हिजन कर्नाटका मेगा एक्झिबिशन’ चे बेळगाव येथे दिमाखात उद्घाटन करण्यात आले. हे तीन दिवसीय प्रदर्शन 23, 24 आणि 25 जून दरम्यान नागरिकांसाठी खुले राहणार आहे.
बेळगावमध्ये या प्रदर्शनाचे दुसऱ्यांदा आयोजन करण्यात आले असून, खासदार जगदीश शेट्टर यांच्या मार्गदर्शनाखाली आयोजित या उपक्रमाचे उद्घाटन त्यांच्या हस्ते फीत कापून करण्यात आले.
यावेळी बेळगाव दक्षिणचे आमदार अभय पाटील, बेळगाव महानगरपालिकेच्या महापौर प्रीती कामकर, उपमहापौर हनमंत कोंगाली, माजी खासदार मंगला अंगडी, माजी आमदार संजय पाटील, माजी आमदार अनिल बेनके, माजी विधानपरिषद सदस्य महांतेश कवटगीमठ, मुर्गेंद्र गौडा पाटील, भाजप ग्रामीण जिल्हाध्यक्ष सुभाष पाटील, भाजप महानगर जिल्हाध्यक्ष गीता सुतार, शिल्पा केकर, नागराज पाटील यांच्यासह अनेक मान्यवर उपस्थित होते.
या प्रदर्शनात केंद्र सरकार आणि राज्य सरकारच्या विविध मंत्रालयांशी संबंधित विभागांचे स्टॉल उभारण्यात आले आहेत. नागरिकांना विविध शासकीय योजना, सुविधा आणि सरकारी उपक्रमांची माहिती एका ठिकाणी उपलब्ध करून देण्याचा या प्रदर्शनाचा उद्देश आहे.
विविध विभागांचे अधिकारी, तज्ज्ञ आणि शास्त्रज्ञ या प्रदर्शनात सहभागी झाले असून, सामान्य नागरिकांना त्यांच्या उपयोगाच्या योजना समजावून सांगण्यात येणार आहेत.
प्रयास इव्हेंटचे संचालक मितू यांनी सांगितले की, “सरकारकडून नागरिकांसाठी राबविण्यात येणाऱ्या विविध योजनांची माहिती सर्वसामान्यांपर्यंत पोहोचावी, यासाठी हे प्रदर्शन महत्त्वपूर्ण ठरणार आहे. बेळगावकरांनी या प्रदर्शनाला भेट देऊन सरकारी योजनांची माहिती घ्यावी.”
