बेळगाव : कर्नाटक राज्याची महत्त्वपूर्ण राजकीय हंगामी बैठक – विधिमंडळाचे हिवाळी अधिवेशन – यंदा ८ ते १९ डिसेंबर या कालावधीत बेळगावातील सुवर्ण विधानसौध येथे होणार आहे. मंत्रिमंडळाच्या बैठकीनंतर कायदा आणि संसदीय कामकाज मंत्री एच. के. पाटील यांनी अधिकृत माहिती जाहीर केली.
मुख्यमंत्री सिद्धरामय्या यांच्या अध्यक्षतेखाली झालेल्या बैठकीत अधिवेशनाच्या कार्यक्रमास मंजुरी देण्यात आली. अधिवेशन सुरळीत पार पडावे यासाठी बेळगाव जिल्हा प्रशासनाने तयारीला वेग दिला आहे.
जिल्हाधिकारी मोहम्मद रोशन यांनी सर्व संबंधित विभागांच्या अधिकाऱ्यांची बैठक घेऊन वाहतूक व्यवस्था, सुरक्षा, अधिवेशन कक्षांची देखभाल, मीडिया सुविधांसह अन्य आवश्यक कामांचा आढावा घेतला. अधिवेशन काळात शहरात वाढणाऱ्या प्रशासकीय आणि सुरक्षाविषयक गरजांसाठी समन्वय साधण्याच्या सूचना अधिकाऱ्यांना देण्यात आल्या आहेत.
दरवर्षीप्रमाणे यंदाही हिवाळी अधिवेशनात राज्यातील महत्त्वाचे विषय चर्चेत येणार असल्याने बेळगावकरांची उत्सुकता वाढली आहे.
