पार्किंगमधील दुर्दैवी अपघात : कारच्या धडकेत सिक्युरिटी गार्डचा मृत्यू
बेळगाव : न्यू गुड्सशेड रोड परिसरात रविवारी सकाळी घडलेल्या एका दुर्दैवी घटनेत सिक्युरिटी गार्डचा कारच्या धडकेत मृत्यू झाला. अपार्टमेंटच्या पार्किंगमधून कार बाहेर काढताना झालेल्या या अपघातामुळे परिसरात हळहळ व्यक्त केली जात आहे.
मृत गार्डाची ओळख नागेश शटुप्पा देवजी (वय ५६, रा. माळी गल्ली, बेळगाव) अशी झाली आहे. रविवारी (दि. १२ ऑक्टोबर) सकाळी सुमारे साडेदहा वाजता ही घटना घडली. पार्किंगमधून कार बाहेर काढताना नागेश यांना जोराची धडक बसली. गंभीर जखमी अवस्थेत त्यांना तातडीने एका खासगी रुग्णालयात दाखल करण्यात आले; मात्र उपचारदरम्यान त्यांचा मृत्यू झाला.
अपघाताची माहिती मिळताच वाहतूक दक्षिण विभागाचे पोलीस निरीक्षक बसगौडा पाटील व त्यांचा चमू घटनास्थळी पोहोचला व पाहणी केली. पोलिसांनी या प्रकरणी कार चालविणाऱ्या महिलेविरुद्ध गुन्हा दाखल केला असून पुढील तपास सुरू आहे.
नागेश देवजी हे टेगिनकेर गल्लीतील राजगुरु युवक मंडळाचे माजी अध्यक्ष होते. त्यांच्या निधनामुळे मित्रपरिवार आणि स्थानिक समाजात शोककळा पसरली आहे. त्यांच्या मागे आई, पत्नी, मुलगा, मुलगी, दोन भाऊ आणि एक बहीण असा परिवार आहे.
