बेळगाव : महाराष्ट्र राज्य मराठी भाषा विकास महामंडळ, मुंबई आणि शाहू प्रकाशन, बेळगाव यांच्या संयुक्त विद्यमाने ज्योती कॉलेज येथे आयोजित करण्यात आलेल्या विशेष कार्यक्रमात मराठी विषयात शंभर टक्के गुण मिळवणाऱ्या गुणवंत विद्यार्थ्यांचा उत्साहपूर्ण गौरव करण्यात आला.
बेळगाव शहरासह शहरालगतच्या दक्षिण महाराष्ट्र शिक्षण मंडळाच्या शाळांतील सीबीएसई आणि राज्य मंडळाच्या दहावी परीक्षेत मराठी विषयात उल्लेखनीय यश संपादन करणाऱ्या विद्यार्थ्यांना यावेळी सन्मानित करण्यात आले.
कार्यक्रमाच्या अध्यक्षस्थानी दक्षिण महाराष्ट्र शिक्षण मंडळाचे उपाध्यक्ष श्री. राजाभाऊ पाटील होते. व्यासपीठावर सचिव श्री. विक्रम पाटील, सहसचिव श्री. डॉ. दीपक देसाई, सर सचिव श्री. पी. पी. बेळगांवकर, संचालक श्री. बाळाराम पाटील, श्री. मोहन बी. निर्मळकर, श्री. अनंत एस. देसाई तसेच श्री. सुरेश पाटील आदी मान्यवर उपस्थित होते.
या सोहळ्यात दक्षिण महाराष्ट्र शिक्षण मंडळ संचलित ज्योती सेंट्रल स्कूलच्या सीबीएसई दहावी बोर्ड परीक्षेत मराठी विषयात १०० पैकी १०० गुण मिळवणाऱ्या अदिश्री अशोक पाटील, आदर्श राजकुमार पाखरे आणि तनिष्का रमेश कोकीतकर या विद्यार्थ्यांचा विशेष सत्कार करण्यात आला. गुणवंत विद्यार्थ्यांना प्रमाणपत्र, मानचिन्ह, एक हजार रुपयांची रोख रक्कम आणि पुस्तक भेट देऊन गौरविण्यात आले.
कार्यक्रमाला शिक्षण मंडळाच्या विविध शाळांचे मुख्याध्यापक, शिक्षक, विद्यार्थी आणि पालक मोठ्या संख्येने उपस्थित होते. मराठी भाषेप्रती विद्यार्थ्यांमध्ये वाढत असलेली आवड आणि गुणवत्तापूर्ण शिक्षणाचा हा गौरव असल्याची भावना यावेळी व्यक्त करण्यात आली.
