बेळगाव : कडोली गावातील श्री मातंगी देवी मंदिराच्या विकासकामातील स्लॅब पूजन समारंभ उत्साहपूर्ण वातावरणात पार पडला. कर्नाटक राज्याचे सार्वजनिक बांधकाम मंत्री व बेळगाव जिल्ह्याचे पालकमंत्री सतीश जारकीहोळी यांच्या ₹10 लाखांच्या विशेष निधीतून मंदिराचे विकासकाम सुरू असून, या कामातील महत्त्वाचा टप्पा असलेल्या स्लॅब पूजनाचा कार्यक्रम आयोजित करण्यात आला.
या विकासकामासाठी चिक्कोडी लोकसभा मतदारसंघाच्या खासदार प्रियांका जारकीहोळी, तसेच डीसीसी बँक व अपेक्स बँकेचे संचालक आणि कर्नाटक प्रादेशिक युवक काँग्रेसचे सरचिटणीस राहुल जारकीहोळी यांच्या मार्गदर्शनाखाली निधी उपलब्ध करण्यात आला असल्याचे यावेळी सांगण्यात आले.
मंदिराच्या स्लॅबचे पूजन केपीसीसी सदस्य मलगौडा पाटील यांच्या हस्ते धार्मिक विधीपूर्वक करण्यात आले. कार्यक्रमाला मंदिर पंचकमिटीचे पदाधिकारी, ग्रामपंचायत सदस्य, गावातील ज्येष्ठ नागरिक, मान्यवर तसेच मोठ्या संख्येने ग्रामस्थ उपस्थित होते.
गावातील धार्मिक व सामाजिक विकासाला चालना देणाऱ्या या उपक्रमाचे उपस्थितांनी स्वागत करत मंदिराचे काम लवकर पूर्ण व्हावे, अशी अपेक्षा व्यक्त केली.
