कंग्राळी बुद्रुक (ता. बेळगाव) येथे येत्या २८ एप्रिल २०२६ रोजी होणाऱ्या महालक्ष्मी देवी यात्रेच्या तयारीला वेग आला आहे. परंपरेचा वारसा जपत गावात भक्तीचा माहोल तयार झाला असून, रविवारी (१२ ऑक्टोबर २०२५) देवी मंदिरात देणगीदार सन्मान सोहळा भक्तिमय वातावरणात पार पडला.
कार्यक्रमाची सुरुवात महालक्ष्मी देवीच्या मंगलपूजेनं करण्यात आली. त्यानंतर यात्रा समितीचे अध्यक्ष जयराम पाटील, उपाध्यक्ष अनिल पावशे आणि पदाधिकारी यांच्या हस्ते देणगीदारांचा श्रीफळ व मानपत्र देऊन सन्मान करण्यात आला.
समारंभात गावकऱ्यांच्या उदार सहभागाची झलक स्पष्टपणे दिसून आली. विविध देणगीदारांनी यात्रेच्या आयोजनासाठी मनमोकळ्या हाताने मदत केली. त्यात दत्ता रामा पाटील व पांडु रामा पाटील यांनी ५१ हजार रुपये, बसनगौडा जी. पाटील यांनी ११,१२१ रुपये, उमेश आचार्य परिवार व विद्या संजय भातकांडे यांनी प्रत्येकी १० हजार रुपये, किरण यल्लाप्पा कोलते, बसाप्पा मल्लाप्पा कुलगोड व जगन्नाथ लक्ष्मण चव्हाण यांनी प्रत्येकी सुमारे ५ हजार रुपये, तसेच नवीन आचार्य यांनी २,१०० रुपये आणि यशवंत पाटील यांनी ५,०११ रुपये अशी देणगी अर्पण केली.
या देणग्यांमुळे यात्रेच्या तयारीला बळ मिळाले असून गावकऱ्यांनी मोठ्या संख्येने उपस्थित राहून सन्मान सोहळ्याला उत्सवी रंग चढवला.
कार्यक्रमात उपस्थित मान्यवरांनी सांगितले की, “समाजातील प्रत्येकाचा सहभाग हीच यात्रेची खरी शान आहे. सामूहिक भावनेतूनच हा पारंपरिक उत्सव अधिक तेजस्वी होईल.”
