*उद्यापासून अनगोळ येथे विश्वकर्मा महोत्सव*

उद्यापासून अनगोळ येथे विश्वकर्मा महोत्सव

बेळगांव:श्री विश्वकर्मा मनुमय पांचाळ संघ, अनगोळतर्फे यंदा ३१ वा ‘श्री विश्वकर्मा महोत्सव’ साजरा करण्यात येणार आहे. यानिमित्त रविवारी (ता. ९) व सोमवारी (ता. १०) विविध कार्यक्रमांचे आयोजन करण्यात आले आहे. रविवारी महिला व शालेय मुला-मुलींसाठी विविध स्पर्धा घेण्यात येणार आहेत.

सकाळी ११ ते दुपारी १ या वेळेत महिलांसाठी रांगोळी स्पर्धा व मुला-मुलींसाठी चित्रकला स्पर्धा होणार आहे. सायंकाळी ५ ते ६ या वेळेत शालेय मुला-मुलींसाठी व महिलांकरिता लिंबू चमचा, संगीत खुर्ची स्पर्धा होणार आहे. सायंकाळी ७ ते रात्री ९ या वेळेत नृत्य, तसेच गायन स्पर्धा आयोजित करण्यात आली आहे. सोमवारी सकाळी ८-३० वा. प्रकाश सावंत सुतार यांच्या हस्ते ध्वजारोहण होणार आहे. ९ वा. श्री विश्वकर्मा मूर्तीवर महाअभिषेक, १० वा. तीर्थप्रसाद १२.३० पर्यंत श्री विश्वकर्मा उत्सव पाळणा, तर दुपारी १ पासून महाप्रसादाचे वाटप होणार आहे. याप्रसंगी प्रमुख पाहुणे म्हणून दक्षिणचे आमदार अभय पाटील यांच्यासह जितेंद्र गुंडप्पण्णवर, माजी नगरसेवक विनायक गुंजटकर आदी उपस्थित राहणार आहेत.

सायंकाळी ४ ते ५ गुरुदत्त सेवा भजनी मंडळ यांचा भजन कार्यक्रम, ५ ते ६ महिलांसाठी हळदी-कुंकू समारंभ होणार असून, याप्रसंगी प्रमुख पाहुण्या म्हणून माजी महापौर शोभा सोमणाचे, मीना बेनके, अर्चना मेस्त्री (कम्मार), सुवर्णा पाटील, आदी उपस्थित राहणार आहेत. सायंकाळी ६ वाजता मान्यवरांच्या हस्ते बक्षीस वितरण कार्यक्रम होणार असून रात्री ८ ते ९ या वेळेत माऊली भजनी मंडळाचा भजन कार्यक्रम, तर ९ ते १० या वेळेत श्रीराम भजनी मंडळ अनगोळ यांचा भजन कार्यक्रम होणार आहे. समाज बांधवांनी कार्यक्रमास उपस्थित राहावे, असे संघातर्फे कळविण्यात आले आहे.

Independent Journalism Can’t Be Independent Without Your Support, Contribute By Clicking Below.