उत्तर कर्नाटकातील गुन्हेगारी प्रवृत्तींना आळा घालण्यासाठी पोलिसांनी जुलै महिन्यात विशेष मोहीम राबवत रौडींच्या हालचालींवर मोठ्या प्रमाणात कारवाई केली. बेळगाव, विजयपूर, बागलकोट, धारवाड आणि गदग या पाच जिल्ह्यांत पोलिसांनी रौडींच्या हालचालींवर लक्ष केंद्रित करून प्रतिबंधात्मक तसेच कठोर कायदेशीर कारवाई केली.
या मोहिमेसाठी पोलीस ठाणे आणि पोलीस वर्तुळ कार्यालयांच्या स्तरावर तब्बल ५३ रौडी निवारण पथके सक्रिय करण्यात आली होती. संशयित गुन्हेगारांच्या हालचालींवर लक्ष ठेवण्यासोबतच भविष्यातील गुन्हेगारी कारवाया रोखण्यावर या पथकांनी भर दिला.
१४८ जणांवर प्रतिबंधात्मक कारवाई
रौडींच्या माध्यमातून शांतता व सुव्यवस्थेला धोका निर्माण होऊ नये यासाठी बीएनएसएसच्या कलम १२६, १२७, १२८ आणि १२९ अंतर्गत एकूण १४८ प्रकरणांमध्ये प्रतिबंधात्मक कारवाई करण्यात आली.
जिल्हानिहाय कारवाईचा आढावा घेतला असता विजयपूर जिल्हा आघाडीवर आहे.
- बेळगाव : ३२
- विजयपूर : ७०
- बागलकोट : २०
- धारवाड : २
- गदग : २४
यामध्ये विजयपूर जिल्ह्यात सर्वाधिक ७० जणांवर प्रतिबंधात्मक कारवाई करण्यात आली.
२३ रौडींना जिल्ह्याबाहेरचा रस्ता
वारंवार गुन्हेगारी कारवायांमध्ये सहभागी असलेल्या रौडींविरोधात कर्नाटक पोलीस कायद्यानुसार हद्दपारीची कारवाई करण्यात आली. या मोहिमेत २३ जणांविरोधात हद्दपारीचे आदेश जारी करण्यात आले.
यामध्ये विजयपूरमधील १, बागलकोटमधील १०, धारवाडमधील २ आणि गदगमधील १० जणांचा समावेश आहे.
सहा जणांवर गुंडा कायद्याचा बडगा
गुन्हेगारी कारवायांना आळा घालण्यासाठी पोलिसांनी गुंडा कायद्याचाही वापर केला. बेळगाव, विजयपूर आणि बागलकोट या तीन जिल्ह्यांत प्रत्येकी दोन अशा एकूण सहा जणांवर गुंडा कायद्यांतर्गत कारवाई करण्यात आली.
हारूगेरी प्रकरणात पाच आरोपींवर ‘कोका’
संघटित गुन्हेगारीविरोधातही पोलिसांनी कठोर भूमिका घेतली आहे. हारूगेरी पोलीस ठाण्याच्या हद्दीतील एका गुन्हेगारी प्रकरणातील पाच आरोपींवर ‘कोका’ कायद्यांतर्गत कारवाई करण्यात आली आहे. या प्रकरणाचा पुढील तपास सुरू आहे.
पाच जिल्ह्यांत पोलिसांचा कडक वॉच
जुलै महिन्यात राबविण्यात आलेल्या या विशेष मोहिमेत ५ जिल्हे, ५३ रौडी निवारण पथके, १४८ प्रतिबंधात्मक कारवाया, २३ हद्दपारीचे आदेश, ६ गुंडा कायद्यांतर्गत कारवाया आणि ५ आरोपींवर कोका अशी ठोस कारवाई करण्यात आली.
रौडींच्या हालचालींवर सातत्याने लक्ष ठेवून गुन्हेगारी प्रवृत्तींना आळा घालणे आणि नागरिकांमध्ये सुरक्षिततेची भावना निर्माण करणे हा या मोहिमेचा उद्देश असल्याचे पोलीस अधीक्षक रामराजन यांनी सांगितले.
पोलिसांच्या या कारवाईमुळे उत्तर कर्नाटकातील गुन्हेगारी प्रवृत्तींवर नियंत्रण ठेवण्यासाठी प्रशासनाने कठोर भूमिका घेतल्याचे स्पष्ट झाले आहे.
