देशसेवेला सलाम! 24 वर्षांची गौरवशाली कारकीर्द पूर्ण करून सब मेजर मुकुंद जोशी यांची सन्माननीय निवृत्ती
बेळगाव
भारतीय सैन्यात तब्बल 24 वर्षे निष्ठा, शिस्त आणि समर्पणाने सेवा बजावल्यानंतर आर्मी एज्युकेशनल कॉर्प्स (AEC) मधील सब मेजर मुकुंद जोशी यांनी सन्मानपूर्वक निवृत्ती स्वीकारली. त्यांच्या दीर्घ आणि उल्लेखनीय सेवेमुळे कुटुंबीयांसह निपाणी परिसरात अभिमानाचे वातावरण निर्माण झाले आहे.
निपाणीचे मूळ रहिवासी आणि सध्या गलतगा (ता. निपाणी) येथे वास्तव्यास असलेले मुकुंद जोशी यांनी 2002 मध्ये भारतीय सैन्यात प्रवेश केला. सेवाकाळात त्यांनी जम्मू-काश्मीर, पंजाब, राजस्थान, ईशान्य भारत तसेच हैदराबादसारख्या महत्त्वाच्या ठिकाणी विविध जबाबदाऱ्या समर्थपणे पार पाडल्या. त्यांच्या सैनिकी कारकिर्दीचा समारोप बेळगाव येथील द मराठा लाईट इन्फंट्री रेजिमेंटल सेंटर (The Maratha LIRC) येथे झाला.
लष्करी सेवेदरम्यान त्यांनी विविध आर्मी पब्लिक स्कूलमध्ये अॅडमिनिस्ट्रेटर जेसीओ म्हणूनही उल्लेखनीय योगदान दिले. विशेषतः बेळगाव येथील आर्मी पब्लिक स्कूलमध्ये शैक्षणिक व प्रशासकीय कामकाज अधिक प्रभावी करण्यासाठी त्यांनी महत्त्वाची भूमिका बजावली.
सब मेजर जोशी यांच्या पत्नी, जुळ्या मुली, आई तसेच एलआयसी एजंट म्हणून कार्यरत असलेले भाऊ मनोज जोशी असा परिवार आहे.
त्यांच्या निवृत्तीप्रसंगी कुटुंबीय, सहकारी, मित्रपरिवार आणि हितचिंतकांनी त्यांचे अभिनंदन करत पुढील आयुष्य निरोगी, आनंदी आणि यशस्वी जावो, अशा शुभेच्छा दिल्या. देशसेवेसाठी दिलेल्या त्यांच्या योगदानाबद्दल परिसरातूनही त्यांचा गौरव करण्यात येत आहे.
