बेळगाव : दुर्गामाता दौडीच्या प्रारंभापूर्वीच शास्त्री नगर परिसरातील रस्त्याची दयनीय अवस्था समोर आली असून, स्थानिक नागरिकांकडून नाराजी व्यक्त करण्यात येत आहे. दौडीची पहिली फेरी शास्त्री नगरमधून जाणार असल्याने रस्त्याची तातडीने दुरुस्ती आणि परिसरातील स्वच्छता करण्याची मागणी रहिवाशांनी केली आहे.
शास्त्री नगरमधील संबंधित मार्गावर दगड-माती पसरली असून, रस्त्याच्या कोपऱ्यावर कचऱ्याचे ढीग साचल्याचे स्थानिक रहिवाशांचे म्हणणे आहे. या परिस्थितीमुळे दुर्गामाता दौडीत सहभागी होणाऱ्या भाविकांना तसेच नागरिकांना अडचणींचा सामना करावा लागू शकतो. विशेषतः मोठ्या संख्येने भाविक या मार्गावरून जात असताना सुरक्षिततेच्या दृष्टीने योग्य उपाययोजना करणे आवश्यक असल्याचे नागरिकांनी म्हटले आहे.
एकीकडे दुर्गामाता दौडीच्या स्वागतासाठी परिसरात उत्साहाचे वातावरण असताना, दुसरीकडे रस्त्याची दुरवस्था आणि अस्वच्छतेचा प्रश्न कायम असल्याने स्थानिकांकडून चिंता व्यक्त होत आहे.
दौडीला प्रारंभ होण्यापूर्वी संबंधित प्रशासनाने रस्त्यावरील दगड-माती हटवून आवश्यक दुरुस्ती करावी, तसेच साचलेल्या कचऱ्याची तातडीने विल्हेवाट लावावी, अशी मागणी करण्यात येत आहे.
दुर्गामाता दौडीच्या पार्श्वभूमीवर प्रशासन या समस्येची दखल घेऊन तातडीने कार्यवाही करणार का? याकडे आता शास्त्री नगरमधील रहिवासी आणि भाविकांचे लक्ष लागले आहे.
— स्थानिक रहिवाशांच्या तक्रारीवर आधारित

