कर्नाटकात सुरू असलेल्या स्पेशल इंटेन्सिव्ह रिव्हिजन (SIR) अर्थात मतदार यादीच्या विशेष सखोल पुनरावलोकन प्रक्रियेत सर्व नागरिकांनी सक्रिय सहभाग नोंदवावा, असे आवाहन बेळगाव येथील सकल मराठा समाजाने केले आहे.
समाजाचे समन्वयक किरण जाधव यांनी प्रसिद्ध केलेल्या आवाहनात, मतदार यादीतील प्रत्येक नागरिकाची माहिती, कुटुंबाची नोंद आणि पत्त्याची अचूक पडताळणी होत असल्याने ही प्रक्रिया अत्यंत महत्त्वाची असल्याचे नमूद करण्यात आले आहे.
आवाहनात म्हटले आहे की, समाजातील एकही नागरिक या प्रक्रियेपासून वंचित राहू नये. भविष्यात मतदानाचा अधिकार बजावताना किंवा विविध शासकीय योजनांचा लाभ घेताना कोणतीही अडचण निर्माण होऊ नये, यासाठी सर्वांनी आवश्यक माहिती वेळेत संबंधित बीएलओकडे सादर करावी.
समाजाच्या मते, या प्रक्रियेमुळे मतदार यादीतील माहिती अचूक राहण्यास मदत होईल. तसेच भविष्यातील शासकीय नोंदी आणि योजनांसाठी आवश्यक असलेला डेटा अधिक विश्वासार्ह होईल. याशिवाय मराठा समाजाची अधिकृत लोकसंख्या आणि माहिती योग्य प्रकारे नोंदवली जाण्यासही या प्रक्रियेचा फायदा होणार असल्याचे आवाहनात नमूद करण्यात आले आहे.
सर्व समाजबांधवांनी निर्धारित फॉर्म काळजीपूर्वक भरून आपल्या परिसरातील संबंधित बीएलओ कार्यालयात जमा करावेत, असेही आवाहन करण्यात आले आहे.
एसआयआर प्रक्रियेबाबत अधिक माहितीसाठी इच्छुकांनी सकल मराठा समाजाच्या जनसंपर्क कार्यालयाशी, गुडशेड रोड, बेळगाव येथे संपर्क साधावा किंवा समन्वयक किरण जाधव यांच्याशी ९४४८१३५८०७ या क्रमांकावर संपर्क साधावा, असे आवाहन करण्यात आले आहे.
