बेळगाव : दंतव्यंगोपचार (ऑर्थोडोंटिक्स) क्षेत्रात अत्याधुनिक मानले जाणारे ‘ग्राफी शेप मेमरी अलाइनर’ (SMA) हे नवीन तंत्रज्ञान बेळगावातील वन डेंटल क्लिनिक येथे सादर करण्यात आले असून हे तंत्रज्ञान सुरू करणारा उत्तर कर्नाटकातील हा पहिला दंतोपचार केंद्र असल्याची माहिती दक्षिण कोरियातील ग्राफी कंपनीच्या प्रतिनिधींनी दिली.
शहरातील वन डेंटल क्लिनिकमध्ये शुक्रवारी आयोजित पत्रकार परिषदेत दक्षिण कोरियाच्या ग्राफी टीमचे प्रतिनिधी लुईस ॲन (विक्री विभाग संचालक), तन्वीर (मुख्य रासायनिक अभियंता) आणि अपूर्वा यांनी या आधुनिक तंत्रज्ञानाची माहिती पत्रकारांना दिली. यावेळी त्यांनी डिजिटल ऑर्थोडोंटिक्समधील या नव्या प्रणालीचे महत्त्व आणि त्याचे रुग्णांना होणारे फायदे सविस्तरपणे स्पष्ट केले.
ग्राफी शेप मेमरी अलाइनर ही पारंपरिक क्लियर अलाइनर प्रणालीपेक्षा अधिक प्रगत पिढीची उपचार पद्धत मानली जाते. विशेष प्रकारच्या शेप मेमरी मटेरियलचा वापर करून तयार करण्यात येणाऱ्या या अलाइनरमुळे दात हलवण्यासाठी सातत्यपूर्ण आणि सौम्य दाब निर्माण होतो, ज्यामुळे दातांची हालचाल अधिक प्रभावी आणि अचूकपणे करता येते.
मुख्य रासायनिक अभियंता तन्वीर यांनी सांगितले की, या तंत्रज्ञानामुळे डॉक्टरांना रुग्णांच्या दातांच्या स्थितीनुसार अत्यंत अचूक आणि सानुकूलित अलाइनर डिझाइन करता येतात. त्यामुळे उपचार प्रक्रिया अधिक आरामदायी, वेगवान आणि अचूक होण्यास मदत होते.
पत्रकार परिषदेदरम्यान उपस्थितांना या अत्याधुनिक तंत्रज्ञानाची ओळख करून देण्याबरोबरच प्रगत अलाइनर वर्कफ्लोचे प्रात्यक्षिक देखील दाखविण्यात आले. डिजिटल ऑर्थोडोंटिक्स आणि आधुनिक स्मित सुधारणा उपचारांच्या दृष्टीने ग्राफी शेप मेमरी अलाइनर ही पद्धत उत्तर कर्नाटकातील दंतचिकित्सा क्षेत्रासाठी महत्त्वाचा टप्पा ठरणार असल्याचे यावेळी सांगण्यात आले.
