बेळगाव : किडनीविकारांनी त्रस्त रुग्णांसाठी बेळगावात आणखी एक महत्त्वाची वैद्यकीय सुविधा उपलब्ध झाली आहे. एअरपोर्ट रोडवरील डॉ. रवी पाटील मल्टिस्पेशालिटी हॉस्पिटलमध्ये नेफ्रो-युरोलॉजी विभागाचा शुभारंभ रविवार, ३० ऑगस्ट २०२६ रोजी करण्यात आला.
या नव्या विभागाच्या माध्यमातून किडनीशी संबंधित विविध आजारांचे निदान, उपचार आणि आवश्यक वैद्यकीय देखभाल एकाच ठिकाणी उपलब्ध करून देण्याचा प्रयत्न करण्यात आला आहे. विभागाच्या उद्घाटनप्रसंगी कर्नाटक उत्तर प्रांत कार्यकारिणी सदस्य अरविंदजी देशपांडे, कर्नाटक उत्तर प्रांत कार्यवाह राघवेंद्रजी कागवाड, क्षेत्र शारीरिक प्रमुख सुधीरजी गाडगीळ, विद्या भारती कर्नाटक राज्याध्यक्ष परमेश्वरजी हेगडे, नगर संघचालक बालण्णाजी काग्गणगी आणि प्रांत उपाध्यक्ष श्रीकांत कदम यांची प्रमुख उपस्थिती होती.
देशात किडनी निकामी होण्याच्या रुग्णांची संख्या सातत्याने वाढत असल्याने डायलिसिसची गरजही मोठ्या प्रमाणावर निर्माण होत आहे. अशा परिस्थितीत अत्याधुनिक उपचारांसोबतच सर्वसामान्यांना परवडणाऱ्या दरात सेवा मिळणे गरजेचे आहे. हीच गरज लक्षात घेऊन रुग्णालयाने नेफ्रो-युरोलॉजी विभाग सुरू केल्याचे सांगण्यात आले.
नव्या विभागाचे एक महत्त्वाचे वैशिष्ट्य म्हणजे किडनीविषयक आजारांसाठी मोफत कन्सल्टेशन उपलब्ध करून देण्यात आले आहे. तसेच आर्थिकदृष्ट्या गरजू आणि डायलिसिसची आवश्यकता असलेल्या रुग्णांसाठी सबसिडी दरात केवळ ₹500 मध्ये डायलिसिस सेवा उपलब्ध करून देण्यात आली आहे.
डायलिसिसची सुविधा २४ तास उपलब्ध राहणार असल्याने आपत्कालीन परिस्थितीतही रुग्णांना वैद्यकीय मदत मिळण्यास मदत होणार आहे.
रुग्णालयात नेफ्रॉलॉजिस्ट आणि युरॉलॉजिस्ट यांच्यासह न्यूरोसर्जन, प्लास्टिक सर्जन, फिजिशियन आणि जनरल सर्जन अशा विविध वैद्यकीय शाखांतील तज्ज्ञ डॉक्टर उपलब्ध आहेत.
याशिवाय प्रशिक्षित नर्सिंग स्टाफ, डायलिसिस टेक्नॉलॉजिस्ट, सुसज्ज आयसीयू आणि ऑपरेशन थिएटर यांसारख्या आवश्यक सुविधा रुग्णालयात उपलब्ध करून देण्यात आल्या आहेत.
किडनीविकारांसह गंभीर स्वरूपाच्या आजारांवर उपचार घेत असलेल्या रुग्णांना वेगवेगळ्या ठिकाणी जाण्याची आवश्यकता कमी व्हावी, तसेच तज्ज्ञांचा सल्ला, तपासणी, उपचार आणि पुढील वैद्यकीय देखभाल एकाच ठिकाणी मिळावी, या उद्देशाने विभागाची उभारणी करण्यात आली आहे.
परवडणाऱ्या दरात दर्जेदार आरोग्यसेवा उपलब्ध करून देण्याच्या या उपक्रमामुळे बेळगाव आणि परिसरातील किडनी रुग्णांना मोठा फायदा होण्याची अपेक्षा व्यक्त केली जात आहे.
D Media | बेळगाव
