बेळगाव : हिंडलगा मध्यवर्ती कारागृहातील कैद्यांच्या आरोग्याची काळजी घेत त्यांना वेळेवर वैद्यकीय सेवा उपलब्ध करून देण्यासाठी विशेष आरोग्य तपासणी शिबिराचे आयोजन करण्यात आले. या शिबिरात कारागृहातील कैद्यांची विविध आरोग्यविषयक तपासणी करण्यात आली.
KLE रुग्णालयातील डॉक्टर आणि वैद्यकीय कर्मचाऱ्यांच्या पथकाने हिंडलगा कारागृहात भेट देऊन कैद्यांची सर्वसमावेशक आरोग्य तपासणी केली. तपासणीदरम्यान काही कैद्यांना उपचाराची आवश्यकता असल्याचे आढळून आल्यानंतर त्यांना आवश्यक औषधांचे वितरणही करण्यात आले.
या आरोग्य उपक्रमासाठी JNMC Charitable Hospitalचे प्राचार्य डॉ. राजेश पवार, आर. एस. मुधोळ तसेच डॉक्टर आणि वैद्यकीय कर्मचाऱ्यांनी विशेष सहकार्य केले. त्यांच्या सहकार्यामुळे शिबिराचे नियोजन आणि अंमलबजावणी सुरळीतपणे पार पडली.
कार्यक्रमाला जिल्हा आरोग्य अधिकारी डॉ. आय. पी. गडदाड आणि माजी महापौर विजय मोरे यांची प्रमुख उपस्थिती होती. यावेळी कारागृहाच्या वैद्यकीय अधिकारी डॉ. सरस्वती, KLE Charitable Hospitalचे PRO बसवराज, हिंडलगा कारागृहातील अधिकारी, वैद्यकीय कर्मचारी आणि इतर कर्मचारी उपस्थित होते.
कारागृहातील कैद्यांच्या आरोग्याची नियमित काळजी घेणे आणि आवश्यक उपचार वेळेत उपलब्ध करून देणे या उद्देशाने आयोजित करण्यात आलेल्या या उपक्रमाचे उपस्थितांनी स्वागत केले. डॉक्टर, रुग्णालयातील कर्मचारी आणि कारागृह प्रशासनाने समन्वयाने काम करत शिबिर यशस्वी केल्याबद्दल आयोजकांकडून सर्वांचे कौतुक करण्यात आले.
