बेळगाव ग्रामीण मतदारसंघाच्या आमदार लक्ष्मी हेब्बाळकर यांना राज्य मंत्रिमंडळात स्थान द्यावे, या मागणीसाठी त्यांच्या समर्थकांनी बेळगाव तालुक्यातील बडस के.एच. क्रॉस येथे अर्धनग्न आंदोलन करत तीव्र नाराजी व्यक्त केली.
आंदोलकांनी सरकार आणि काँग्रेस पक्षाच्या नेतृत्वाकडे लक्ष वेधत, लक्ष्मी हेब्बाळकर यांना मंत्रिमंडळात तातडीने संधी देण्याची मागणी केली. त्यांच्या मते, पक्ष संघटन बळकट करणे तसेच मतदारसंघातील विकासकामांमध्ये त्यांनी सातत्याने सक्रिय भूमिका बजावली असून त्यांच्या कार्याची योग्य दखल घेतली जावी.
प्रदर्शनादरम्यान आंदोलकांनी घोषणाबाजी करत आपल्या मागण्यांकडे दुर्लक्ष झाल्यास आंदोलन आणखी तीव्र करण्याचा इशाराही दिला.
या आंदोलनात काँग्रेस अल्पसंख्याक विभागाचे जिल्हा पदाधिकारी मनसूर अली अत्तार यांच्यासह अशोक अंगडी, पर्वतगौडा पाटील, रवी मेळेद, प्रकाश पाटील, बसवंत नाईक आणि इतर काँग्रेस कार्यकर्ते व लक्ष्मी हेब्बाळकर यांचे समर्थक सहभागी झाले.
या आंदोलनामुळे बेळगावच्या राजकीय वर्तुळात चर्चेला उधाण आले असून, मंत्रिमंडळ विस्ताराच्या पार्श्वभूमीवर या मागणीकडे लक्ष वेधले जात आहे.
