गोकाकजवळ भीषण अपघात; बस-दुचाकीच्या समोरासमोर धडकेत वडील, चिमुकलीसह तिघांचा जागीच मृत्यू
गोकाक | डी मीडिया
बेळगाव जिल्ह्यातील गोकाक तालुक्यातील कोण्णूर गावाजवळ गुरुवारी सकाळी झालेल्या भीषण रस्ता अपघातात वडील, त्यांची चार वर्षीय मुलगी आणि आणखी एका व्यक्तीचा जागीच मृत्यू झाला. हिडकलहून गोकाकच्या दिशेने येणाऱ्या प्रवासी बस आणि दुचाकी यांच्यात समोरासमोर जोरदार धडक झाल्याने हा हृदयद्रावक अपघात घडला.
या अपघातात सैफ मुल्ला (वय 29), त्यांची मुलगी सिजा मुल्ला (वय 4) आणि इम्तियाज भडगाव (वय 35) यांचा घटनास्थळीच मृत्यू झाला. प्राथमिक माहितीनुसार, सैफ मुल्ला हे आपल्या लाडक्या मुलीला शाळेत सोडण्यासाठी दुचाकीवरून निघाले होते. मात्र, नियतीने त्यांच्या प्रवासालाच दुर्दैवी पूर्णविराम दिला.
घटनेनंतर बसचालकाने बस घटनास्थळीच सोडून तेथून पलायन केल्याची माहिती समोर आली आहे. अपघाताची माहिती मिळताच गोकाक पोलिसांनी तातडीने घटनास्थळी धाव घेतली. पंचनामा करून मृतदेह उत्तरीय तपासणीसाठी पाठविण्यात आले असून, अपघाताचे नेमके कारण शोधण्यासाठी तपास सुरू करण्यात आला आहे.
या दुर्दैवी घटनेमुळे परिसरात हळहळ व्यक्त होत असून मृतांच्या कुटुंबीयांवर दुःखाचा डोंगर कोसळला आहे. पोलिसांकडून पुढील कायदेशीर प्रक्रिया सुरू आहे.
