निप्पाणी तालुक्यात माजी सैनिक भवनाच्या बांधकामास प्रारंभ
निप्पाणी : देशाच्या संरक्षणासाठी आयुष्य वेचणारे सैनिक हेच आपल्या सुरक्षित जीवनाचे खरे शिल्पकार असल्याचे मत चिक्कोडी लोकसभा मतदारसंघाच्या खासदार प्रियांका जारकीहोळी यांनी व्यक्त केले. माजी सैनिकांनी देशासाठी दिलेल्या अमूल्य सेवेच्या बदल्यात सरकारकडून मिळणाऱ्या सुविधा आणि सवलतींचा योग्य लाभ घ्यावा, असे आवाहनही त्यांनी केले.
निप्पाणी तालुक्यातील तवंदी गावात खासदार स्थानिक क्षेत्र विकास निधी (MPLADS) अंतर्गत २० लाख रुपयांच्या खर्चातून उभारण्यात येणाऱ्या माजी सैनिक भवनाच्या भूमिपूजन सोहळ्यात त्या बोलत होत्या.
खासदार जारकीहोळी म्हणाल्या की, देशाच्या सीमेवर सतत सज्ज असलेले सैनिक आपल्यासाठी शांतता आणि सुरक्षितता सुनिश्चित करतात. निवृत्तीनंतरही त्यांच्या सन्मानात कोणतीही कमतरता राहू नये, यासाठी माजी सैनिकांसाठी असलेल्या योजना आणि सुविधा अधिक प्रभावीपणे राबवण्यात येतील. तवंदी येथे उभारण्यात येणारे माजी सैनिक भवन लवकरच पूर्ण होऊन ते माजी सैनिक आणि त्यांच्या कुटुंबीयांसाठी उपयुक्त ठरेल, असा विश्वास त्यांनी व्यक्त केला.
त्या पुढे म्हणाल्या की, शेतकरी, सैनिक आणि कामगार हे देशाचे खरे आधारस्तंभ आहेत. या तीन घटकांच्या योगदानाशिवाय देशाची प्रगती शक्य नाही. त्यामुळे देशसेवेनंतर माजी सैनिकांनीही आत्मविश्वासाने पुढे येत सरकारी योजनांचा लाभ घ्यावा, असे त्यांनी नमूद केले.
या कार्यक्रमास बेळगाव बुडा अध्यक्ष लक्ष्मणराव चिंगळे, नेते उत्तम पाटील, सुप्रिया पाटील, सुजय पाटील,
तवंदी ग्रामपंचायत अध्यक्षा लक्ष्मी कांबळे, उपाध्यक्ष संजय पाटील, निप्पाणी तालुक्यातील माजी सैनिक, ग्रामस्थ व ज्येष्ठ नागरिक मोठ्या संख्येने उपस्थित होते.
