बेळगाव : शहरातील सरदार मैदानावर सुरू असलेल्या डॉ. बाबासाहेब आंबेडकर चषक टेनिस बॉल क्रिकेट स्पर्धा दरम्यान एक अनोखा आणि हृदयस्पर्शी प्रसंग पाहायला मिळाला. वाढत्या उन्हामुळे तहानलेल्या प्राण्यांची अवस्था बिकट होत असताना, याच पार्श्वभूमीवर एका माकडाने थेट सुरू असलेल्या सामन्याच्या व्यासपीठावर येत पाण्याची तहान भागवली.
सामना रंगात आला असताना अचानक एक माकड पाण्याच्या शोधात मैदानावर दाखल झाले. उपस्थित प्रेक्षक व खेळाडू क्षणभर चकित झाले, मात्र कुणीही त्याला त्रास न देता शांतपणे परिस्थिती हाताळली. त्या माकडाची तहान ओळखून एका व्यक्तीने पुढे येत त्याला पाण्याची बाटली दिली.
विशेष म्हणजे, माकडाने कोणतीही भीती न बाळगता थेट बाटलीतून पाणी पिले आणि काही क्षणात तेथून निघून गेले. या घटनेने उपस्थितांमध्ये मानवता आणि प्राण्यांप्रती सहानुभूतीचा संदेश दिला.
उन्हाचा प्रचंड तडाखा वाढत असताना वन्यजीव पाण्यासाठी मानवी वस्त्यांकडे वळत असल्याचे हे जिवंत उदाहरण ठरले आहे. या घटनेचा व्हिडिओ सोशल मीडियावरही मोठ्या प्रमाणात व्हायरल होत आहे.
