बेळगाव शहरातील खडेबाजार पोलीस ठाण्याच्या हद्दीत असलेल्या एका सराफा दुकानात पहाटेच्या सुमारास चोरीचा प्रयत्न झाल्याची घटना उघडकीस आली आहे. या घटनेमुळे परिसरात एकच खळबळ उडाली असून पोलिसांनी तपासाला सुरुवात केली आहे.
प्राथमिक माहितीनुसार, रात्री सुमारे ३ वाजण्याच्या सुमारास काही संशयित एका वाहनातून येऊन दुकानाचे कुलूप तोडण्याचा प्रयत्न करत होते. त्यानंतर काही वेळाने दुसऱ्या वाहनातून आलेल्या एका व्यक्तीने दुकानातील काही वस्तू नेल्याचा संशय व्यक्त केला जात आहे. मात्र, नेमक्या कोणत्या वस्तू चोरीला गेल्या आहेत, याबाबत अद्याप अधिकृत माहिती समोर आलेली नाही.
घटनेची माहिती मिळताच खडेबाजार पोलिसांनी घटनास्थळी धाव घेत पंचनामा सुरू केला. परिसरातील सीसीटीव्ही फुटेजची तपासणी करण्यात येत असून संशयितांचा शोध सुरू आहे.
या प्रकरणाचा अधिक तपास खडेबाजार पोलीस करत आहेत.
