निलगार गणपतीचे मुख्य सेवेकरी अशोक हेद्दूरशट्टी यांचे निधन – दर्शन तात्पुरते बंद
संकेश्वर :
संकेश्वर शहरातील निलगार गणपती उत्सवाशी निगडित दु:खद घटना समोर आली आहे. निलगार गणपतीची परंपरा जपणारे आणि या उत्सवाचे प्रमुख सेवेकरी असलेले हेद्दूरशट्टी घराण्यातील अशोक हेद्दूरशट्टी यांचे आज निधन झाले.
त्यांच्या आकस्मिक निधनामुळे संकेश्वर निलगार गणपती भक्तांमध्ये शोककळा पसरली आहे. भाविकांच्या भावनांचा विचार करून आज व उद्या (दि. ३१ ऑगस्ट व १ सप्टेंबर) निलगार गणपतीचे दर्शन तात्पुरते बंद ठेवण्यात आले आहे, अशी माहिती आयोजकांनी दिली.
अशोक हेद्दूरशट्टी यांनी अनेक वर्षे भक्तीभावाने गणपती बसविण्याची सेवा बजावली होती. त्यांच्या निधनामुळे संकेश्वरच्या धार्मिक व सांस्कृतिक क्षेत्राला मोठी पोकळी निर्माण झाली आहे.
