बेळगाव परिसरातील धार्मिक स्मारक अनुभव मंडप यासह अनेक मंदिराचा जीर्णोद्धार करण्याकरिता आमदार अनिल बेनके यांनी दिल्ली येथे भारत सरकारच्या पर्यटन आणि बंदरे ,शिपिंग आणि जलमार्ग खात्याचे राज्यमंत्री श्रीपाद नाईक यांची भेट घेतली.
यावेळी त्यांनी भेटीदरम्यान बेळगाव परिसरातील मंदिरांचा विकास आणि जीर्णोद्धारासाठी निधी मंजूर करावा अशी मागणी श्रीपाद नाईक यांच्याकडे केली. यावेळी अनिल बेनके यांनी केलेल्या विनंतीला मान देऊन आवश्यक निधी मंजूर केला जाईल असे आश्वासन मंत्री श्रीपाद नाईक यांनी दिले.
बेळगाव परिसरातील चार महत्त्वाची धार्मिक मंदिरे आणि बाराव्या शतकातील भगवान श्री बसवेश्वर अनुभव मंडप प्रतिकृती ची स्थापना करण्यासाठी पाचशे लाखांचा निधी उपलब्ध करण्याची मागणी यावेळी आमदार अनिल बेनके यांनी निवेदनाद्वारे केली.
या निवेदनात नमूद केलेल्या स्मारकामध्ये श्री बसवेश्वर मंदिर कणबर्गी, मठ गल्ली आणि बसवान गल्ली येथील चिक्क बस्ती आणि दोड्ड बस्ती तसेच महांतेश नगर येथील अनुभव मंडप चा समावेश निवेदनात करण्यात आला आहे.
