जीवन संगीत कार्यक्रमाचा नागरिकांनी लुटला आनंद
संगीत आणि आपले दैनंदिन जीवन यांचा जवळचा संबंध आहे.संगीताच्या सांनिध्यात आपले अनेक ताण आणि तणाव निघून जातात.दररोज आपल्यावर कळत नकळत संगीत परिणाम करून जात असते याचे सादरीकरण जीवन संगीत कार्यक्रमात डॉ.संतोष बोराडे यांनी केले.
आश्रय फाऊंडेशन आणि रिसोर्स ग्रुप यांच्यावतीने लोकमान्य रंगमंदिर येथे जीवन संगीत कार्यक्रमाचे आयोजन करण्यात आले होते.अनेक गाणी ,घटना ,प्रसंग यांना एकत्रित गुंफून डॉ. संतोष बोराडे यांनी उपस्थितांना एका वेगळीच अनुभूती दिली.
गाणी आणि आपल्या भावना यांचा जवळचा कसा संबंध आहे हे बोराडे यांनी चिठ्ठी आयी है वतनसे चिठ्ठी आयी है हे गीत सादर करून श्रोत्यांना भावनावश केले.यावेळी उपस्थितांच्या डोळ्यातून नकळत अश्रू तरळले.नेमका हाच धागा पकडून बोराडे यांनी एखादे गाणे ऐकले की आपण नकळत कसे भावनावश होतो आणि व्यक्त होतो हे समजावून सांगितले.
जवळच्या व्यक्तीचा स्पर्श देखील क्षणार्धात आपले ताण विसरायला लावतो.प्रत्येकाने आपल्याला आवडते ते गाणे आपल्या पद्धतीने म्हणावे म्हणजे आपल्या मनात साठलेल्या भावनांचा निचरा होतो.उपस्थित श्रोत्यांशी संवाद साधून संतोष बोराडे यांनी जीवन हे संगीत कसे आहे हे समजावून सांगितले.
यावेळी मोफत नेत्र तपासणी शिबिराचे आयोजन सिद्धार्थ नेत्रालायाच्या वतीने करण्यात आले होते.डॉ.संतोष बोराडे यांना नरेंद्र भोईर आणि प्रीतीश चौधरी यांनी साथसंगत केली.कार्यक्रम यशस्वी करण्यासाठी आश्रय फाउंडेशनच्या सफल नागरत्ना रामगौडा आणि रिसोर्स ग्रुपचे भालचंद्र पाटील यांनी विशेष परिश्रम घेतले.
